დაავადებათა კონტროლის ეროვნული ცენტრი მოსახლეობას მოუწოდებს, კოვიდ-19-ის პრევენციის მიზნით შეასრულონ რეკომენდაციები, კერძოდ, საპნით ხშირად დაიბანონ ხელები, დაიცვან 2-მეტრიანი დისტანცია და ნიღბის ტარება ნორმად აქციონ.

გუშინ ტელეკომპანია “პალიტრანიუსის” ეთერში კორონავირუსის შესახებ ისაუბრა პოპულარულმა ტელეწამყვანმა, ალერგოლოგმა და იმუნოლოგმა ბიძინა კულუმბეგოვმა. მან გააჟღერა ძალიან საინტერესო სიახლე ნიღბის ტარების სასიკეთო ეფექტის შესახებ.

„მეცნიერულად დაზუსტდა, რომ, თუ მე ნიღაბი მიკეთია და დამემართება კოვიდ-ინფექცია, ვირუსის ნაკლები რაოდენობა მოხვდება ჩემს ორგანიზმში, რაც იმას ნიშნავს, რომ უსიმპტომოდ ან ძალიან მსუბუქად წამივა ინფექცია მაშინ, როდესაც, თუ დიდი რაოდენობით, ვთქვათ, 100 ვირუსი, მოხვდება ჩემს ორგანიზმში, ჩემი იმუნური სისტემა ვერ გაუმკლავდება“, - განაცხადა ცნობილმა მედიკოსმა.

უკანასკნელი ცნობების თანახმად მსოფლიოში გამოვლენილია კორონავირუსის 28 329 822 შემთხვევა, საიდანაც 913 931 ფატალურად დასრულდა.