”ამ წვეთებს შეუძლიათ ახლოს მყოფი ადამიანის პირის ღრუში ან ცხვირში შეღწევა”, – ამბობს ამერიკის დაავადებათა კონტროლის და პრევენციის ეროვნული ცენტრი.

ჯანდაცვის მსოფლიო ორგანიზაცია გირჩევთ, რომ მინიმუმ 1 მეტრის დაშორებით იმყოფებოდეთ იმ ადამიანებისგან, ვინც შეიძლება იყოს კორონავირუსის მატარებელი.

4. თუ Covid-19-ის მქონე პაციენტს ფილტვების ანთება დაემართა, რა ანტიბიოტიკებია ეფექტური?

კორონავირუსის საწინააღმდეგო საშუალება არაა ანტიბიოტიკები, რადგან Covid-19 არის ვირუსული და არა ბაქტერიული ინფექცია.

”თუმცა, თუკი კორონავირუსის გამო საავადმყოფოში მოხვდით, შეგიძლიათ, მიიღოთ ანტიბიოტიკები, რადგან შეიძლება ფილტვების ანთებამ პარალელურად ბაქტერიული ბუნებაც შეიძინოს”, – ნათქვამია ჯანდაცვის მსოფლიო ორგანიზაციის განცხადებაში.

კორონავირუსის სამკურნალო საშუალება ამ ეტაპზე არ არის ცნობილი. მკვლევარები სწავლობენ, შეძლებს თუ არა ანტივირუსული მედიკამენტი რემდესივირი კორონავირუსის დამარცხებას, მაგრამ ამ პრეპარატის ტესტირება სულ ახლახანს დაიწყო.

ამჟამად კორონავირუსის მქონე პაციენტები იღებენ, ასე ვთქვათ, "დამხმარე" მკურნალობას, "რაც გულისხმობს სითხეების მიცემას, მედიკამენტებს ცხელების შესამცირებლად და, განსაკუთრებით მძიმე შემთხვევებში ჟანგბადის პროცედურებსაც", – აცხადებენ ჰარვარდის სამედიცინო სკოლაში.

მეცნიერები მუშაობენ ვაქცინის შექმნაზე. მაგრამ კლინიკური კვლევების დაწყებამდე მინიმუმ თვეები მაინც რჩება და წელიწადზე მეტი კიდევ მანამდე, ვიდრე ვაქცინის შეძენა შესაძლებელი გახდებოდეს.

5. კორონავირუსით დაავადებულ ადამიანს შეუძლია გადარჩეს და გამოჯანმრთელდეს?

რასაკვირველია. კორონავირუსით დაავადებული ადამიანების უმეტესი ნაწილი გადარჩა.

ამერიკის ალერგიის და ინფექციური დაავადებების ეროვნული ინსტიტუტის დირექტორის შეფასებით, კორონავირუსით გარდაცვალების მაჩვენებელი "დაახლოებით 2%-ია".

მაგრამ სიკვდილიანობის რეალური მაჩვენებელი შეიძლება ბევრად უფრო დაბალიც კი იყოს, რადგან კორონავირუსისგან გადარჩენილი ზოგიერთი ადამიანი არ ყოფილა გამოკვლეული.

6. კორონავირუსისგან გამოჯანსაღების შემდეგ, აქვს გამოჯანმრთელებულ პაციენტს ვირუსის მიმართ იმუნიტეტი?

ჯერ ძალიან ადრეა საიმისოდ, რათა ეს დანამდვილებით ვიცოდეთ. “თუ გამოჯანმრთელდებით, გექნებათ იმუნიტეტი? და თუ იმუნიტეტი გაგიჩნდათ, რამდენ ხანს დაგიცავთ ის?” – ეს ის კითხვებია, რაც ვაქცინაზე მომუშავე მეცნიერებს ამჟამად ყველაზე მეტად აღელვებს.