იტალიაში კორონავირუსის 76-მდე შემთხვევაა დაფიქსირებული. აქედან ფატალურად უკვე დასრულდა ორი.

ჩაკეტილ დასახლებულ პუნქტებთან უშიშროების ძალებია განლაგებული. თუმცა მთავრობა მზადყოფნას გამოთქვამს, საჭიროების შემთხვევაში საქმეში თავდაცვის სამინისტროს დანაყოფებიც ჩართოს.

ვინც ჩაკეტილი დასახლებული პუნქტების დატოვებას შეეცდება, სისხლისსამართლებრივი პასუხისმგებლობა დაეკისრება და საკარანტინე პროცედურების გავლის შემდეგ ციხეში აღმოჩნდება. სისხლისსამართლებრივი პასუხისმგებლობაა დაწესებული ასევე მათთვის, ვინც ჩაკეტილ ქალაქებში შესვლას შეეცდება.

მილანში ჯორჯიო არმანიმ მოდის დაანონსებული ჩვენება გააუქმა. ლომბარდიაში, პიემონტსა და ვენეციაში დახურულია ასევე სკოლები და აკრძალულია სპორტული შეჯიბრებების და სხვა ხალხმრავალი ღონისძიებების მოწყობა.

შაბათსვე იტალიის 16 მოქალაქე, რომლებიც საკრუიზო ლაინერ “ბრილიანტის პრინცესაზე” იმყოფებოდნენ, რომელიც იაპონიის პორტში საკარანტინე პროცედურებს გადის, სამხედრო თვითმფრინავის მეშვეობით დააბრუნეს სამშობლოში.

უკანასკნელი მონაცემებით, დაინფიცირებულთა საერთო რაოდენობამ მსოფლიოში უკვე გადააჭარბა 76 ათასს, საიდანაც 2300 გარდაიცვალა.