როგორც მოგეხსენებათ ტელეკომპანია "რუსთავი 2" დიდხნიანი დავის შემდეგ ბიზნესმენ ქიბარ ხალვაშს დაუბრუნდა, რომელმაც არხის გენერფალური დირექტორი ნიკა გვარამია დაკავებული თანამდებობიდან გადააყენა და მის ნაცვლად თავისივე უფლებების დამცველი პაატა სალია დანიშნა. არხის თანამშრომლების დიდი ნაწილი ყოფილი გენერალური დირექტორის გათავისუფლებას ვერ ეგუება. ნიკა გვარამია უკვე რამდენიმე დღეა საზღვარგარეთ იმყოფება და როგორც მისი ფეისბუქსტატუსიდან ვგებულობთ, ის მაღალი დონის მოლაპარაკებებს აწარმოებს სხვადასხვა პროფესიის ადამიანებთან ახალი არხის შექმნის თაობაზე. ჯერ კიდევ ორი დღის წინ ჭორაობდნენ ამის შესახებ სოციალურ ქსელში და გვარამიას მომხრეები აქტიურად აზიარებდნენ მჟავიას სტატუსს, რომელიც დაბეჯითებით ამტკიცებდა, რომ ახალ ტელევიზიას "ლაზიკა ტვ" ერქმეოდა. დღეს უკვე ყველასთვის ნათელი გახდა წინა ხელისუფლების ყოფილი პროკურორისა და იუსტიციის ყოფილი მინისტრის გადაწყვეტილება, რაზეც გვარამიამ სოციალურ ქსელში დაწერა: - " მოკლედ, მეგობრებო, არც თუ ისე დიდი ხნის, თუმცა ძალიან მძიმე და ინტენსიური ფიქრის შემდეგ, გადაწყვეტილება მიღებულია.ბევრ ფიქრს მოყვა ბევრი კონსულტაცია: პროფესიონალებთან, პოტენციურ ინვესტორებთან ქვეყნის შიგნით და მის ფარგლებს გარეთ, და, რაც მთავარია, ამ ქვეყნის პატრიოტებთან და დემოკრატიის გულშემატკივრებთან.გადავწყვიტე: რამდენიმე პარტნიორთან ერთად, გავაკეთო ამ ქვეყნის მთავარი ტელევიზია, მთავარი და საუკეთესო. უკეთესი, ვიდრე ნებისმიერი სხვა. უკეთესი, ვიდრე ის, რომელიც აქამდე ყველაზე საუკეთესო მგონია.ჩემთვის ეს, ალბათ, ცხოვრების მთავარი გამოწვევაა - მე კრიზის-მენეჯერი ვარ, არ მიყვარს რუტინა და არასდროს მიშენებია ნულიდან. მე შემიძლია გავაცოცხლო მკვდარი კომპანია, მაგრამ არასდროს მიმიცია დასაბამი ახალი კომპანიის სიცოცხლისთვის. ამ გამოწვევაში ზუსტად ვიცი, ვისი დახმარება მჭირდება, ვინ იქნება ჩემი მთავარი დასაყრდენი - ჩემი გუნდი.ჩემი ამბიცია მხოლოდ საუკეთესოს გაკეთებაა, და საუკეთესოს, ცხადია, მხოლოდ საუკეთესოები გააკეთებენ.ბოლო მოვლენების შემდეგ, უკიდურესად დაღლილმა, ერთად ერთი დღის განმავლობაში ვიფიქრე ქვეყნიდან წასვლაზე და დალაგებულ ცხოვრებაზე მშვიდ ქვეყანაში. ახლა, ამ დღის გამო, საჯაროდ ბოდიშს ვუხდი საკუთარ თავს, საკუთარ ოჯახს და ყველას, ვინც ელოდით ჩემს გადაწყვეტილებას, ვინც გულშემატკივრობთ ჩემს საქმეს, ვინც ფიქრობთ, რომ პატრიოტებმა და მედასავლეთეებმა ქვეყანა არ უნდა დავთმოთ, ვინც ჩემს თანაგუნდელად მოიაზრებთ საკუთარ თავს.