თუ ბავშვობაში კოსმონავტობაზე ოცნებობდით და ეს ოცნება ვერ აიხდინეთ, მაშინ გაემგზავრეთ ჩინეთში ან იაპონიაში. რატომ?-იმიტომ რომ მათი კულტურა, ტრადიციები და თუნდაც სამზარეულო იმდენად განსხვავდება ჩვენისაგან, რომ თავს ნამდვილად უცხო პლანეტაზე იგრძნობთ.

მინდა წარმოგიდგინოთ რაღაც, რაც აზიაშია დამზადებული...კარგად დააკვირდით სურათს და ეცადეთ გამოიცნოთ, თუ რა არის ეს.

პირველი, რაც ამ ფოტოს ნახვისას თავში მომივიდა, ის იყო, რომ ეს "რაღაც" უზარმაზარ წყლის წვეთს წარმოადგენდა, რომელიც თეფშზე დევს.

ვერც თქვენ მიხვდით არა, რას წარმოადგენს ეს უზარმაზარი წყლის წვეთი? კარგით, აღარ გაწვალებთ და გეტყვით, რომ ეს არის იაპონურ-ჩინური დელიკატესი Shingen Mochi, ანუ ბრინჯის ტორტი, სახელად Mizu. ალბათ იტყვით, ბრინჯის ტორტი რაღა უბედურებააო. მაგრამ ეს სულაც არაა გასაკვირი, აზიელები ხომ ბრინჯისაგან ყველაფერს აკეთებენ: ბრინჯის ქაღალდს, ბრინჯის არაყს და ღვინოსაც კი. ბრინჯი მათთვის პურის მაგიერიცაა, ამიტომ მათთვის პრობლემას არ წარმოადგენს, რომ ტორტიც ბრინჯისაგან გააკეთონ.

ტორტი დამზადებულია ბრინჯისა და აგარ-აგარისაგან, რომელიც ჟელატინის შემცვლელია, უფრო სწორად, ზუსტად აგარ-აგარია ბუნებრივი ჟელატინი და არა ის საშინელება, რომელიც ჩვენთან იყიდება და ცხოველების ჩლიქებისა და მყესებისაგან კეთდება.

ამ დესერტის შემხედვარე გეგონება, რომ ის ეს - ესაა გასკდება, თუკი კოვზით შევეხებით, მაგრამ ეს ასე სულაც არაა. მშვენივრად შეიძლება მისი მირთმევა კოვზით, მაგრამ მომზადებიდან აუცილებლად ნახევარი საათის განმავლობაში. ამ დროის გასვლის შემედგ Mizu უბრალოდ გადნება თეფშზე და წყლად იქცევა.

როგორც წესი, Mizu-ს სტუმრებს მიართმევენ სოიოს ფხვნილსა და სოიისავე ყავისფერ ტკბილ სოუსთან ერთად.