დილით გაღვიძებულმა ქალმა აღმოაჩინა, რომ საძაღლეში თავისი საყვარელი ძაღლის ნაცვლად უშველებელი პითონი იყო მოკალათებული. შემთხვევა ავსტრალიაში მოხდა. ქალმა ძაღლი ღამით ლითონის ჯაჭვით დაბმული დატოვა. ძაღლი ღამით პითონმა შეჭამა. მისი პირიდან ჯერ კიდევ გამოდიოდა ძაღლის ყელზე მობმული ჯაჭვი, რის გამოც გველმა სხვაგან გაცოცება ვერ შეძლო და ძაღლის ქოხში მოიკალათა. ქალმა თავის საყვარელ ჩიხუახუას ქოხთან დაბმით თვითონ გამოუტანა სასიკვდილო განაჩენი. ძაღლი დაბმული რომ არ ყოფილიყო გველს გაექცეოდა.

ქალმა დილით ძაღლს დაუძახა, მაგრამ ხმა რომ ვერ გაიგო ჯაჭვი გამოქაჩა. ჯაჭვს რაც გამოჰყვებოდა ალბათ ხვდებით. ქალი შიშისგან ისე გაქვავდა, რომ კარგა ხანს განძრევა ვერ შეძლო. როგორც კი გონს მოეგო, მაშინვე სამაშველო სამსახურის წარმომადგენლები გამოიძახა და 2, 5 მეტრის სიგრძის გველი წააბრძანეს.

ველური ბუნების დამცველმა ქალბატონმა ულუატმა განაცხადა, რომ გველი ველური ცხოველებისთვის განკუთვნილ ადგილობრივ საავადმყოფოში წაიყვანეს. იქ ჯაჭვი გადაჭრეს და გველს ოპერაცია ჩაუტარეს. მუცლიდან ამოაცალეს ჯაჭვის ნარჩენი და ძაღლის ძვლები. "მძიმე ღამისთევის" და ოპერაციის შემდეგ ველური ბუნების ამ საპატიო წარმომადგენელს სიცოცხლე შეუნარჩუნეს. გველი კარამბინის საავადმყოფოში გადაიყვანეს, სადაც სრულ გამოჯანმრთელებამდე დარჩება.

ქალბატონი ულუარის ცნობით, გველის ასაკი დაახლოებით 50 წელია. ამ ხნისას არ უნდა გაუჭირდეს ოპერაციიც გადატანა. ამ ფაქტმა ძალიან შეაშინა ახლომახლო მცხოვრები ძაღლის პატრონები, თუმცა სტატისტიკას თუ დავუჯერებთ, ეს ბოლო ათ წელიწადში მეორე შემთხვევაა. ისიც უნდა ვიფიქროთ, რომ ძაღლი დაბმული რომ არ ყოფილიყო, მას უბრალოდ დაკარგულად ჩათვლიდნენ.