ყავისა და შოკოლადის მოყვარულებს ვთავაზობ უნაზეს და უგემრიელეს ტორტს, რომელსაც "ყავის სიმფონიას" უწოდებენ.ნაზი ყავისა და შოკოლადის ბისკვიტის გემო შერწყმული მსუბუქ ხაჭოს კრემთან, მართლაც არაჩვეულებრივ სიმფონიას ქმნის, რომელიც გაგილამაზებთ ნებისმიერ სადღესასწაულო სუფრას.

თუ გინდათ ჩემო ძვირფასო დიასახლისებო თქვენც ისიამოვნოთ ამ გემრიელი ტორტით, შემოგთავაზებთ მის ტეცეპტს დაწვრილებით და გასაგებად, რომელსაც თან დაერთვის ფოტოებიც და ეს გაგიადვილებთ საქმეს.პირველ რიგში მოვამზადოთ საჭირო პროდუქტები.

ბისკვიტის ინგრედიენტები:

*კვერცხი–4ც

*ხსნადი ყავა–4ჩ.კ

*წყალი–2/3ჭ

*ფქვილი–2ჭ

*შაქარი–1, 5ჭ

*გამაფხვიერებელი–1, 5ჩ.კ

*მარილი–1ჩ.კ

*მცენარეული ზეთი (რაფინირებული)–1/2ჭ

*ვანილი–1შეკვრა.

*შავი შოკოლადი–1ფილა

*ლიმონმჟავა–1/2ჩ.კ

კრემის ინგრედიენტები:

*ნაღები35%–ანი–400გრ

*ხაჭო–400გრ

*არაჟანი 200გრ

*შაქრის პუდრა–200გრ

მ ო მ ზ ა დ ე ბ ა:

პირველად უნდა დავაცხოთ ყავიან–შოკოლადიანი ნაზი ტორტის ბისკვიტი.ეს ბისკვიტი ისე ჰაეროვანი გამოდის, როგორც ღრუბელი.მოვამზადოთ ბისკვიტი:პირველ რიგში ყავა გავხსნათ ცხელ წყალში.შოკოლადი გავხეხოთ სახეხზე, ან დანით გავხეხოთ.

მოზრდილ ჯამზე ავურიოთ ფქვილი, შაქარი, გამაფხვიერებელი და ცოტა მარილი.გული ჩავუღრმავოთ მასას და ჩავასხათ ზეთი, გახსნილი ყავა, კვერცხის გულები და ვანილი.

კარგად ავურიოთ და შემდეგ დავუმატოთ გახეხილი შოკოლადი და ისევ ავურიოთ.

ცალკე მშრალ ჯამზე ავთქვიფოთ ცილა ლიმონმჟავასთან ერთად კარგად, ისე რომ ჯამი რომ გადმოვაბრუნოთ ბეზე მყარად უნდა დარჩეს და დავუმატოთ ცომს.

ნაზად უნდა მოვურიოთ ცომს რომ ბეზედან ჰაერი არ გამოიდევნოს.

ფორმის ძირში დავაფინოთ პერგამენტის ქაღალდი, წავუსვათ კარაქი და ჩავასხათ ბისკვიტის მასა.

ღუმელი გავახუროთ 180 გრადუსზე და ვაცხოთ 1საათის განმავლობაში.შევამოწმოთ მზადყოფნა ხის ჩხირით.

გამოვიტანოთ და ყალიბიდან ამოვიღოთ და გავაცივოთ კარგად.გაცივების შემდეგ ბისკვიტი გავყოთ 3 ნაწილად.

ბისკვიტი გამოდის ძალიან ნაზი, ოდნავ ნესტიანი, როგორც დანამული და მსუბუქი ყავისა და შოკოლადის არომატით.

ახლა მოვამზადოთ კრემი:

ხაჭოს დავუმატოთ შაქრის პუდრი და არაჟანი და დავამუშაოთ ბლენდერში ერთგვაროვან მასის მიღებამდე.კრემი არ გამოდის ძალიან ტკბილი და თუ თქვენ გიყვართ უფრო ტკბილი, დაუმატეთ შაქარი.

ცალკე ჭურჭელში ავთქვიფოთ ნაღები ვიდრე ჰაეროვანი არ გახდება.

ნაზად შევურიოთ ეს მასა ხაჭოს კრემს.

კრემი უკვე მზადაა.წავუსვათ ერთ ფენას კრემი, დავადოთ მეორე ფენა, შემდეგ მესამე და მთელი ტორტი დავფაროთ კარგად კრემით. ზედაპირი გავასწოროდ დანით ლამაზად.

მოვრთოთ სურვილისამებრ.მე გვერდებზე მოვრთე შოკოლადის ნამტვრევებით და ზემოდან კაკაოს ფხვნილით.კარგია მოვახეხოთ მოხალული კაკალი ან თხილი.

3–4 საათი გააჩერეთ მაცივარში და ჩაისთან ან ყავასთან ერთად დატკბით ამ დესერტით!

გემრიელად მიირთვით!

მრავალ შობა–ახალ წელს დაესწარით!

თქვენი მაშა