ახლა შემოგთავაზებთ ძალიან მარტივად გასაკეთებელ, უგემრიელეს საბავშვო ორცხობილას–"ბუკლეს", რომლითაც დიდებიც ისიამოვნებთ.ძალიან გემრიელია ჩაისთან და ყავასთან ერთად.

რეცეპტს თან ერთვის ფოტოები, რომელიც აადვილებს ნამცხვრის მომზადებას.ამ ორცხობილას მოსამზადებლად საჭიროა

შემდეგი ინგრედიენტები:

–200გრ–კარაქი

–3/4ჭ–შაქრის პუდრა(180გრ)

–4–კვერცხი

–3ჩ.კ–ვანილის ესენცია, ან 1 შეკვრა შაქრიანი ვანილი.

–2ჭ.–პ/ფქვილი

–450გრ–მარწყვის ჯემი ( ჟოლოსი და გარგარის ჯემიც კარგია)

მ ო მ ზ ა დ ე ბ ა:

1)ავთქვიფოთ შერბილებული კარაქი და შაქრის პუდრა კარგად, რომ მივიღოთ კრემის მსგავსი მასა.

2)შევათქვიფოთ კვერცხები და ვანილის ესენცია.

3)კარგად ავთქვიფოთ ერთგვაროვანი მასის მიღებამდე.

4)თანდათან შევათქვიფოთ ფქვილი.უნდა მივიღოთ ელასტიური ცომი, რომელიც ხელზე არ ეკვრის.

5)გადმოვიტანოთ ხის დაფაზე და კარგად დავამუშაოთ ეს ცომი

6)მიღებული ცომი გავყოთ 2 ნაწილად:ერთი უფრო დიდი უნდა იყოს.მეორე პატარა კი გავახვიოთ პოლიეთილენის პარკში და მაცივარში შევდოთ ვიდრე არ დაგვჭირდება.

7)გავახუროთ ღუმელი 180 გრადუს ტემპერატურაზე.ნამცხვრის ქაღალდი დავაფაროთ ნამცხვრის ყალიბის ძირზე და ზედ გავაბრტყელოთ მოზრდილი ცომის ნაწილი, ისე რომ გვერდებზეც ამოვიდეს 1სმ–ზე.

8)გაბრტყელებულ ცომზე გადავუსვათ ჯემი კარგად.

9)გამოვიღოთ მაცივრიდან გამაგრებული ცომი და ჯემწასმულ ფენას მსხვილი სახეხით გადავახეხოთ ზემოდან, ისე რომ ზედაპირი სულ დაიფაროს ამ მასით.

10)შევდგათ გახურებულ ღუმელში 20-25 წუთის განმავლობაში, ვიდრე ნამცხვარი მსუბუქად არ გადაწითლდება.

აი უკვე სავსებით გასაგებად მოგაწოდეთ ამ მარტივი და გემრიელი "ბუკლეს"რეცეპტი.ახლა კი ისღა დაგრჩენიათ, გააკეთოთ და...

მიირთვით გემრიელად!

მრავალ შობა–ახალ წელს დაესწარით!

თქვენი მაშა