გიორგი აფციაური და მისი მეუღლე, სალიტა ჩუბინიძე მოლოდინში არიან-სულ მალე მათ პატარა ოჯახს მესამე წევრი შეემატება. ოქტომბრის დასაწყისში სალიტა იმშობიარებს. ბავშვის სქესი ჯერ არ იციან, პატარა იმალება და ექოსკოპიაზე მისულ მშობლებს ვინაობას არ უმხელს. წყვილისთვის სქესს გადამწყვეტი მნიშვნელობა არ აქვს, მთავარია ბავშვი იყოს ჯანმრთელი. სალიტა პრეტენზიული ორსული არ გახლავთ, მნიშვნელოვანი მოთხოვნებითა და პრეტენზიებით არავის აწუხებს, უბრალოდ მჟავე კიტრს უფრო ხშირად მიირთმევს. ბავშვს სახელს დედა შეურჩევს, ამ მხრივ სრული ავტონომია აქვს. მეუღლეს გამოუცხადა ბავშვი 9 თვე მუცლით მე უნდა ვატარო და სახელსაც თავად შევურჩევო.
"ჩემი აზრით, ადამიანის მომავალს მისი სახელი და გვარი განსაზღვრავს, ამიტომ მინდა ჩემს შვილს განსხვავებული სახელი ერქვას"-ირწმუნება სალიტა. წყვილი ბოლომდე ვერ აცნობიერებს, რომ მალე მშობლები გახდებიან, თუმცა ხვდებიან, რომ მათ ცხოვრებაში ახალი ეტაპი დაიწყო. სალიტა და გიორგი იუმორისტულ გადაცემაში აღარ არიან დაკავებულები. გოგონა მეოთხე კურსის სტუდენტია, სწავლობს და ცდილობს ორსულობის პერიოდში არ გადაიტვირთოს. გიორგი პროფკავშირის ახალგაზრდული განყოფილების ხელმძღვანელია, იმ ადამიანებს უწევს რეკომენდაციებს, ვისაც სამსახურში დაჩაგრავენ ან უსამართლოდ დაითხოვენ.
"საკუთარ თავზე გამოვცადე სამსახურში უსამართლოდ მოქცევა. ეს ის საქმეა, რომელიც იუმორისტულ საქმიანობაში ხელს არ შემიშლის. რაც არ უნდა დამიშალონ საკუთარი იუმორისტული გადაცემის კეთება, ამ საქმეს მაინც არ ჩამოვშორდებო, სახლში ვიჯდები და დავწერ..."-გვარწმუნებს გიორგი. ვუსურვოთ წყვილს წარმატებები...