უკვე ერთი წელი გავიდა მას შემდეგ, რაც ყველასათვის სასურველი სარძლო ანი ქორქია გათხოვდა. მისი რჩეული 26 წლის კახა ჩიქოვანია. ის ერთ-ერთ კომპანიაში მარკეტინგის მენეჯერად მუშაობს.

ანისთვის ქორწინება ძალიან საპასუხისმგებლო და მნიშვნელოვანი ნაბიჯი იყო, არ უნდოდა ეს ნაბიჯი ადრეულ ასაკში გადაედგა. „ერთმანეთი საერთო მეგობრების საშუალებით შემთხვევით გავიცანით, თუმცა მანამდე ვიცოდი გარეგნულად როგორი იყო FACEBOOK-ში მყავდა დამატებული. თავიდან ჯერ თავისი კომპანიით, „მინიბასით“ დამიმეგობრდა და ბევრ კარგ სიმღერას მიდებდა ჩემს გვერდზე. მერე ერთი-ორჯერ გამოველაპარაკე და მითხრა ჩემი გვერდით დაგამატებო, რომ ვნახე მისი გარეგნობაც მომეწონა, ვიფიქრე დავეკონტაქტები ხოლმე, რატომაც არა-თქო. ვერ ვიტყვი, რომ ხშირი მიმოწერა გვქონდა. მიუხედავად იმისა, რომ სულ თვითონ მწერდა პირველი, ძალიან არ აქტიურობდა ხოლმე, „დასტოინად“ იქცეოდა და ფრიად მოვიხიბლე. 2 წელი პერიოდულად ეს ამბავი მიდიოდა. მერე გავიცანი კიდეც. ერთი თვე ყოველდღიური კონტაქტი გვქონდა. ზრდილობიანად მთავაზობდა ხოლმე ყავა დავლიოთო და ა.შ. როცა დავრწმუნდი, რომ მართლა სერიოზული გრძნობა იყო მისი მხრიდან, ჩემშიაც გაიღვიძა რაღაცამ და აღმოვაჩინეთ, რომ ერთად ყოფნა ჯობდა და ვართ იმის მერე შეყვარებულები. ბანალურად, სანთლის შუქზე სიყვარულის ახსნა არ ყოფილა. ყველაფერი უცბად გადაწყდა"-იხსენებს ანი ქორქია.

კახა გვიამბობს: „პირველად სურათი რომ ვნახე, ელდა მეცა. ჩემი მეგობარი ჰყავდა FACEBOOK-ზე მეგობრებში და ჩემი კომპანიის სახელით დავეკონტაქტე. უბრალოდ მომეწონა და გადავწყვიტე დამემატებინა. მის სურათებს თითქმის ყოველდღე ვათვალიერებდი ხოლმე. მაშინ არც ის ვიცოდი, რომ ტელეწამყვანი იყო და არც ის, რომ პოპულარული იყო. თბილისში რომ ჩამოვედი, ისე დაემთხვა, რომ ორ თვეში შემთხვევით შევხვდით ერთმანეთს და მერე ასე ნელ-ნელა განვითარდა ურთიერთობა.

რაიმე განსაკუთრებული ხერხი მის მოსახიბლად არ მქონია. ანი ყველაზე მაგარი გოგოა, ყველაზე მაგარი ადამიანი და მეგობარია''.

ანი მეუღლით მოხიბლულია. მისი თქმით, კახა ნაკითხი და განათლებულია, ჩემი საყრდენია, ვისაც შემიძლია ვენდოო.

წყვილი ერთმანეთს ძალიან კარგად შეეწყო. ცხადია მათ შორის პატარა კამათი და უთანხმოება არსებობს, მაგრამ ეს მხოლოდ რამდენიმე წუთს გრძელდება. ანი ირწმუნება, რომ მეუღლეში ბევრი დადებითი თვისება აღმოაჩინა, ქორწინების პირველი წელი რთული სულაც არ ყოფილაო. მისი თქმით, ახალი წლიდან უკვე დროა ოჯახის მესამე წევრზე ფიქრიც დავიწყოთო.

ვუსურვოთ წყვილს წარმატებები...