- ქუთაისის შემდეგ, 1 წლის გოგიტა აბაშიძის გარდაცვალების ფაქტს თბილისში გააპროტესტებენ. აქციის მონაწილეები ამ დროისთვის რუსთაველის მეტროსთან იკრიბებიან. აქციის მონაწილეები იმ მიზეზებს აპროტესტებენ, რის გამოც 1 წლის გოგიტა აბაშიძე დაიღუპა. აქციის მონაწილეების ნაწილი თავადაც სოციალურად დაუცველია და ისინი ამბობენ, რომ სახელმწიფომ სოციალურად დაუცველებს მეტი ყურადღება უნდა მიაქციოს. აქციის მონაწილეთა მეორე ნაწილი კი აცხადებს, რომ დღეს აქციაზე საკუთარი უმწეობის გასაპროტესტებლად მივიდა. აქცია ჯერ-ჯერობით ხალხმრავალი არ არის, თუმცა ვინც რუსთაველზე შეიკრიბნენ, გარკვეული პერიოდის შემდეგ გადაინაცვლებენ საზოგადოებრივ მაუწყებელთან, რადგან როგორც აქციის ორგანიზატორები და მონაწილეები აცხადებენ საზოგადოებრივმა მაუწყებელმა მეტი დრო უნდა დაუთმოს სოციალური თემების გაშუქებას, რადგან უფრო მეტი ადამიანისთვის გახდეს ცნობილი ამ პრობლემების შესახებ. აქციაში მონაწილეობას იღებენ მწერლები და მუსიკოსებიც. ისინი ამბობენ, რომ კვირის განმავლობაში, ამ თემასთან დაკავშირებით, კიდევ რამდენიმე აქტივობას გეგმავენ.