კარდინალი რიშელიე და კატები: რატომ აღმერთებდა გავლენიანი პოლიტიკოსი ამ ცხოველებს

სხვა

3 თებერვალი, 13:14

იცოდით, რომ იდუმალი და მკაცრი არმან ჟან დიუ პლესი რიშელიე კატების დიდი მოყვარული იყო, რასაც ადასტურებს მრავალი სურათი? ისინი აქ შევკრიბეთ.

რიშელიე და მისი კატები. მხატვარი შარლ ედუარ დელორი, 1868

დღეს მარტივია ნახოთ კატებთან ჩახუტებული ღვთისა და რელიგიის მსახურები, თუმცა დიდი წითელი კარდინალი ცხოვრობდა სრულიად განსხვავებულ დროში, 1585-1642 წლებში. იმ დროს კატების მიმართ სხვა დამოკიდებულება ჰქონდათ. ქრისტიანობას კატა არ მოსწონდა და ეჭვობდა, რომ მას ბნელი ეშმაკისეული ძალების წარმომადგენლები იყენებდნენ. ზოგადად, კატას სახლში იტანდნენ მხოლოდ იმიტომ, რომ მღრღნელებთან ბრძოლაში ეხმარებოდათ. იმ დროს ოთხფეხა ფუმფულა არსებების წამება და მოკვლა ნორმალურად ითვლებოდა.

კატების სიკვდილით დასჯა მე-16 საუკუნეში, ილუსტრაცია წიგნისთვის „კეთილი მეფე ჰენრი“

ასეთი არ იყო წითელი კარდინალი. სახლში ყოველთვის ჰქონდა ამ პატარა ცხოველების მთელი ბუდობა, რაც იწვევდა უამრავ ჭორს, უქმნიდა პოლიტიკურ პრობლემებს, ბადებდა უსარგებლო ინტრიგებს. თავად კარდინალი კატებს თვლიდა შესანიშნავ კომპანიონებად მის არც თუ ისე მარტივ ცხოვრებაში. კატები მის მტკივნეულ სნეულებებს ამსუბუქებდნენ.

ისტორიკოსების თქმით, კარდინალს აწუხებდა ბუასილი, იტანჯებოდა შაკიკით და უკონტროლო ტირილის შეტევებით, განიცდიდა მძიმე მალარიას და დაფარული იყო მტკივნეული წყლულებით. გარდა ამისა, რიშელიე მრავალი წლის განმავლობაში იტანჯებოდა ტუბერკულოზით და გარდაიცვალა იმის შედეგად, რომ დაავადება ფილტვებიდან ძვლებში გავრცელდა.

1642 წლის მაისში კარდინალმა დაიჩივლა:

„ჩემს ხელზე განვითარდა ახალი ანთება და ძველი ჭრილობა, რომლითაც ღმერთმა და ბუნებამ მომნიშნეს, კვლავ გაიხსნა და ჩირქი დიდი რაოდენობით მოედინება. ჩემში არ დარჩა არც მამაცობა, არც ძალა“.

მასთან მოჰყავდათ სხვადასხვა ჯიშის კატები საზღვარგარეთიდან - თურქეთიდან, ინგლისიდან. რიშელიეს ჰყავდა ევროპაში პირველი თურქული ანგორა კატა მიმი პაილონი. კატას ბრიტანეთიდან ფერიმორი ერქვა და ვეფხვს ჰგავდა. კატას პოლონეთიდან ლუდოვიკა ერქვა.

კარდინალი რიშელიე კატებთან ერთად. მხატვარი ჟაკ მარი გასტონ ონფრუა დე ბრევილი

რიშელიეს გარდაცვალების შემდეგ დარჩა 12-14 კატა, რომელთა მოვლა-პატრონობისთვის კარდინალმა საკმაოდ დიდი თანხა გამოყო და მათზე ზრუნვა ძალიან ითხოვა, თუმცა უბედური კატები ვერაფერმა გადაარჩინა. მათ ყველაზე სასტიკად მოექცნენ, რაზეც დაწერა არც გვინდა.

სხვათა შორის, კარდინალის ფავორიტი იყო დიდი შავი კატა სახელად ლუციფერი. იმის გათვალისწინებით, რომ ეს იყო მე-17 საუკუნე, კარდინალს აშკარად ჰქონდა შესანიშნავი იუმორის გრძნობა. ასევე ჰყავდა კატები გაზეთა (მის მიერ გამოქვეყნებული La Gazette-ის პატივსაცემად), მირიამი და ლუი სასტიკი (ვირთხების კარგი დამჭერი).

რა თქმა უნდა, რეჟისორებს არ გამორჩენიათ კარდინალის იდუმალი გატაცება, ამიტომ ფილმებში მუდმივად ვხვდებით ფრანგული პოლიტიკის გენიოსს, რომელიც გარემოცულია ბეწვიანი არსებებით.