მედიკოსებისთვის პენისის წარმატებული გადანერგვა უზარმაზარ ტრიუმფს ნიშნავს. პენისის გადანერგვის ოპერაცია ურთულესია და მსოფლიოში მხოლოდ ძალიან ცოტა ქირურგი თუ მოიძებნება, ვინც ამას წარმატებით განახორციელებს. თუმცა, ის, რაც ტრიუმფი იყო ქირურგებისთვის, მხოლოდ მორიგი სამწუხარო მომენტი აღმოჩნდა პაციენტის ცხოვრებაში, რომელსაც პენისი გადაუნერგეს.

ყველაფერი იმით დაიწყო, რომ გუანჩჟოუში მცხოვრებ 44 წლის ჩინელს 2005 წლის ერთ-ერთ ზამთარს უბედური შემთხვევის შედეგად პენისი იმდენად დაუზიანდა, რომ მედიკოსებმა მისი ამპუტაციის გადაწყვეტილება მიიღეს და მოგვიანებით, ხანგრძლივი კამათის შემდეგ ტრანსპლანტაციის განხორციელების პროცედურაც დაიწყეს. რადგან მსგავსი ოპერაციები ძალიან სარისკოა, ექიმები დიდხანს ყოყმანობდნენ.

მედიკოსებმა პენისი მოიპოვეს ერთი 22 წლის პაციენტის სხეულიდან, რომლის ტვინი მკვდარი იყო. პაციენტის მშობლები დათანხმდნენ მათი ვაჟისთვის პენისის მოშორებას და ექიმებმაც არ დააყოვნეს.

მოჭრილი ათსანტიმეტრიანი ორგანო ქირურგებმა მინუს 4 გრადუს ცელსიუსზე გაციებული ხსნარიდან ამოიღეს, იარაღები მოამზადეს და საქმეს შეუდგნენ. მაგრამ ოპერაცია, როგორც ვარაუდობდნენ, ურთულესი გამოდგა. ის 15 საათს გრძელდებოდა. ბოლოს, როგორც იქნა, გადანერგვა წარმატებით დასრულდა და ექიმებმა შვებით ამოისუნთქეს, ხოლო 10 დღის შემდეგ პაციენტს კათეტერიც მოაშორეს და დაზარალებულ ჩინელ მამაკაცს უკვე თავისით შეეძლო, მოეშარდა.

მაგრამ ეს ისტორია ჰეფი ენდით არ დასრულებულა: ახალმა პენისმა მამაკაცს და მის ცოლს ფსიქიკური პრობლემები შეუქმნა. ისინი ვერ მიეჩვივნენ “უცხო სხეულს” და გამუდმებით შესჩიოდნენ ექიმებს, რომ ეს “მათი” პენისი არ იყო, რომ უმჯობესი იყო, ხელახლა მოეშორებინათ და მამაკაცს უპენისოდ განეგრძო თავისი დარჩენილი არსებობა.

ბოლოს, წარმატებული ოპერაციიდან 14 დღის თავზე ექიმებმა ცოლ-ქმრის სურვილი შეასრულეს და ჩინელი მამაკაცი ხელახლა დატოვეს პენისის გარეშე, ამჯერად უკვე სამუდამოდ.

სწორედ ამაზეა ნათქვამი ძვირფასო მეგობრებო, რაც არ გერგება, არ შეგერგებაო.