სიღნაღის მუნიციპალიტეტის სოფელ ქვემო ბოდბეში ღამით გაჩენილ ხანძარს მსხვერპლი მოჰყვა. გარდაცვლილია 78 წლის გოგია გოგოშვილი, რომელიც სახლში მარტო ცხოვრობდა. წინასწარი ინფორმაციით, აალება შეშის ღუმელმა გამოიწვია.

ხმაური და ცეცხლის ალი მეზობლებმა შენიშნეს და სამაშველო ეკიპაჟი გამოიძახეს, თუმცა მარტოხელა მამაკაცის გადარჩენა ვეღარ მოხერხდა. ცხედარი გურჯაანის ექსპერტიზის ბიუროში გადაასვენეს.

შემთხვევის ადგილზე იმყოფებოდა სიღნაღის მერი გოგი გოგილაშვილი, რომელიც ოჯახს ადგილობრივი ბიუჯეტიდან დახმარებას დაპირდა.

მოკვლევას სიღნაღის რაიონული პოლიცია აწარმოებს. შინაგან საქმეთა სამინისტროს ცნობით, მომხდარ ფაქტთან დაკავშირებით გამოძიება საქართველოს სისხლის სამართლის კოდექსის 188-ე მუხლის მეორე ნაწილით დაიწყო, რომელიც გაუფრთხილებლობით ნივთის დაზიანებას ან განადგურებას გულისხმობს. ამ ეტაპზე ხანძრის გამომწვევი ზუსტი მიზეზი უცნობია.