„საჯარო დაწესებულებაში შრომის ანაზღაურების შესახებ“ კანონის თანახმად, სახელფასო დანამატი და ფულადი ჯილდო აღარ გაიცემა: საქართველოს პრეზიდენტზე, პარლამენტის წევრებზე, პრემიერ-მინისტრზე, მინისტრებზე, აფხაზეთისა და აჭარის უმაღლესი საბჭოებისა და მთავრობების თავმჯდომარეებზე, სახელმწიფო რწმუნებულებზე - გუბერნატორებზე, მუნიციპალიტეტების მერებზე, ასევე საკრებულოების ყველა თანამდებობის პირზე – საკრებულოს თავმჯდომარეზე, მის მოადგილეზე, კომისიის თავმჯდომარეზე, ფრაქციის თავმჯდომარესა და მის მოადგილეზე.

გარდა ამისა, 2018 – 2020 წლების განმავლობაში, აღნიშნული თანამდებობის პირებისთვის აკრძალული იქნება ხელფასის ოდენობის გაზრდა.

გარდამავალ პერიოდში, 2021 წლის 1 იანვრამდე, სახელფასო დანამატის და ფულადი ჯილდოს გაცემა შესაძლებელი იქნება მინისტრის მოადგილეებზე, აფხაზეთისა და აჭარის ავტონომიური რესპუბლიკების მინისტრების მოადგილეებზე, სახელმწიფო რწმუნებულის – გუბერნატორის მოადგილეებსა და მუნიციპალიტეტის მერების მოადგილეებზე. ამ თანამდებობის პირებისათვის დანამატის და ფულადი ჯილდო გაიცემა კანონით დადგენილი ზღვრული ოდენობის ფარგლებში.