როგორც საზოგადოებისთვის ცნობილია, თბილისის ოპერისა და ბალეტის თეატრის ირგვლივ დიდი ხმაურია ატეხილი. თანამშრომელთა ერთი ნაწილი თითქმის ორი წელია იბრძვის ამჟამინდელი სამხატვრო ხელმძღვანელის, დავით კინწურაშვილის თანამდებობიდან გადასაყენებლად. მათი აზრით, კინწურაშვილი დაუმსახურებლად არის არჩეული და თეატრს სათანადოდ ვერ ხელმძღვანელობს. გუშინ კი, თეატრი კიდევ ერთხელ მოექცა საზოგადოების ყურადღების ცენტრში, როცა ქართველმა მომღერალმა, მეცო-სოპრანომ მზია ნიორაძემ სოციალურ ქსელში ოპერისა და ბალეტის თეატრში მიმდინარე გადაღებების ამსხველი რამდენიმე ფოტოები გამოაქვეყნა კომენტარით:

"SOS!!! თბილისის ოპერისა და ბალეტის თეატრი, პორნო ფილმებისათვის გადასაღებ არენად გადაიქცა! ესეც თქვენი კინწურაშვილის ევროპული მენეჯმენტი!"

მას კულტურის სხვა წარმომადგენლებიც ეხმიანებიან, მათ შორის ოპერის ცნობილი მომღერალი თამარ ივერი:

"ოპერის თეატრში დღეს მთელი დღე პორნო ეროტიული სცენების გადაღება იყო.რა დონის ხელმძღვანელიც ჰყავს თეატრს....იმას ჰკადრებს ამ წმინდა ხელოვნების ტაძარს!! და ასეთ ღონისძიებებზე ქირავდება ეს ყოფილი პრემიერის მიერ ახალგარემონტებული ოპერის თეატრი დღეში 3-5 ათას ლარად.ასე რომ, თუ ვინმეს დაბადების დღე, ქორწილი ან ღმერთმა გაშოროთ ქელეხი გაქვთ.....უკეთეს ადგილს ვერ იპოვით.ბატონი დავით კინწურაშვილი გეპატიჟებათ ყველას....ვისაც ხელზე აღნიშნული თანხა გაგაჩნიათ.თუ სურვილია-ნაღდი თანხის დამატებით პაკეტში ასევე..."მინი"ორკესტრსაც შემოგთავაზებთ მისი "ღვინოვ კახურო" და "დამისხი დამალევინე"ს არიების თანხლებებითაც.
და კიდევ ერთ მაგალითს ვიტყვი...ერთმა ნაცნობმა პიროვნებამ გამოსაცდელად დარეკა და ოპერაში 600კაციანი ბანკეტი მოითხოვა.ელოდა რომ ეტყოდნენ...."თქვენ ავად ხომ არ ხართ"ო.გვარს არ დავასახელებთ და ერთმა თანამშრომელმა სრულიად სერიოზულობით უპასუხა...600ს ვერ გავქაჩავთ და 300-400კაცამდე შეიძლებაო.(!!!)
რას ვიზამთ, როცა თეატრს ოფიციალურად 400.000 ინკასო ვალი აქვს....თანხა თუნდაც ქელეხებიდანაც უნდა ამოიღოს." - წერს თამარ ივერი.