"მერსედეს-ბენცის მოდის კვირეული" თბილისში გაიმართა და მას თბილისის თანამედროვე ხელოვნების მუზეუმმა უმასპინძლა. კვირეულის დევიზი გახლავთ "ვაქციოთ ქართული მოდის ინდუსტრია მომგებიან ბიზნესად". მოდის კვირეულის ფარგლებში გაიმართა ცნობილი ქართველი და უცხოელი დიზაინერების ჩვენება, რომელთა შორის არიან: ავთანდილი, საშა კანევსკი, ბესარიონი, ნინო ბაბუხადია, დათუნა სულიკაშვილი, ლიტკოვსკაია, რია ქებურია და სხვანი. მოდის კვირეულზე მოწვეულნი იყვნენ ცნობადი სახეები და ქართული შოუბიზნესის წევრები.
საზოგადოების ყურადღება ფოტომოდელ თამო ვაშალომიძისკენ იყო მიმართული. ის მოდის კვირეულზე სტეფან როლანდის ძალიან თამამი კაბით გამოცხადდა. ინტერნეტსივრცეში უკვე აიტაცეს თამოს სურათები, ზოგი კაბით, ზოგიც მისი სხეულით აღფრთოვანდა. იყვნენ ისეთებიც, ვინც ყოფილი მედავითნის სითამამემ და სიშიშვლემ აღაშფოთა.

ვულგარული თუ მოდური?!-ისმის კითხვა. კაბის მშვენიერება ეჭვქვეშ არ დგას, თუმცა კამათობენ რამდენად შეეფერებოდა მსგავსი ჩაცმულობა ხსენებულ მოდის კვირეულსა და ქართულ საზოგადოებას. ამ ყველაფერს ალბათ მოდის კრიტიკოსები უკეთ უპასუხებენ, ჩვენ კი ვაღიარებთ, რომ თამოს კაბა ძალიან უხდებოდა და მეტიც გოგონა შესანიშნავ ფორმაშია.

თამო თამამად ჩაცმული პირველად როდი გამოჩნდა. გაზაფხულზე, მაისის თვეში ჩატარებულ "მერსედეს-ბენცის მოდის კვირეულზე" ფოტომოდელი გოტიეს თამამი კაბით წარსდგა. კაბას თამოს მოშიშვლებული უკანალი და თამამი დეკოლტე ამშვენებდა. მაშინაც მის ჩაცმულობას დიდი გამოხმაურება მოჰყვა.