საღამო მშვიდობის, ჩემო ხელმარჯვე დიასახლისებო. მინდა შემოგთავაზოთ ძალიან გემრიელი ვაშლის პეროგის რეცეპტი. სცადეთ გამოცხობა...ნამდვილად კმაყოფილი დარჩებით და გაახარებთ თქვენი ოჯახის წევრებს.

მასალა ცომისათვის:

კვერცხი-3 ცალი

შაქარი-1, 5 ჭიქა

კარაქი- 250 გრამი

არაჟანი-100 გრამი

სოდა ძმრით-1 ჩაის კოვზი

ფქვილი- 450 გრამი

ვანილი, მარილი-გემოვნებით

მასალა გულსართისათვის:

მწვანე ვაშლი-4 ცალი

კარაქი-50 გრამი

შაქარი-1 ჩაის ჭიქა

შინდის ჯემი-4 სუფრის კოვზი

მომზადება:

კვერცხის გულები და შაქრის ფხვნილი ავთქვიფოთ კარგად, დავამატოთ დარბილებული კარაქი, ავთქვიფოთ კიდევ 5 წუთი, ჩავასხათ არაჟანი, დავამატოთ მარილი, ვანილი, სოდა ძმრით და ისევ ავთქვიფოთ 1-2 წუთი. შემდეგ დავამატოთ ფქვილი ცოტ-ცოტა და მოვზილოთ ცომი(მიქსერი აღარ უნდა). ცომი უნდა იყოს საკმაოდ სქელი, რომ ხელით გავაბრტყელოთ. დავდოთ ცომი 30 წუთი მაცივარში.

მოვამზადოთ გულსართი: მწვანე ვაშლი გავთალოთ, დავჭრათ პატარა კუბიკებად, დავყაროთ სქელძირიან ტაფაზე, დავამატოთ შაქარი და კარაქი, დავახუროთ ტაფას თავი და მოვშუშოთ დაბალ ცეცხლზე. დროდადრო მოვურიოთ ხის კოვზით. თუ სურვილი გაქვთ, დაუმატეთ დარიჩინი დანის წვერით.

როცა ვაშლი დარბილდება(არ უნდა ჩაიშალოს), გადმოვდგათ ცეცხლიდან და დავყაროთ საწურზე, რომ წვენისაგან კარგად დაიწრიტოს.

გამოვიღოთ ცომი მაცივრიდან, ავიღოთ მისი 1/3 ნაწილი და გავაბრტყელოთ ფქვილიანი ხელით მრგვალ ფორმაში(მე ვიყენებ წითელი თურქული ღუმელის მრგვალ ფორმას). გვერდები ოდნავ ამოვიყვანოთ ხელით. ცომზე წავუსვათ ცოცხალი შინდის ჯემი, ზემოდან გავშალოთ მოშუშული ვაშლი, გადავასწოროთ ხელით.

დარჩენილი ცომი გავაბრტყელოთ ფქვილიან ფიცარზე და ზემოდან გადავაფაროთ ვაშლის ფენას. შევუკეცოთ ლამაზად გვერდები და ზემოდან დავხაზოთ ვაშლისაგან დარჩენილი წვენში დასველებული ჩანგლით.

შევდგათ ღუმელში 150 გრადუსზე და ვაცხოთ დაახლოებით 25-30 წუთი მოწითალო შეფერილობის მიღებამდე.

მიირთვით გემრიელად!