მომღერალი ნინი ბადურაშვილი რთული ზაფხულის შემდეგ აქტიურ ცხოვრებას განაგრძობს. ისედაც პოპულარული მომღერალი პირადმა დრამამ (არშემდგარმა ოჯახმა) თუ მელოდრამამ (პატარა ელენეს დაბადებამ) უფრო პოპულარული და მოთხოვნადი გახადა. მის ცხოვრებაში სიახლეებია. დავიწყოთ იქედან, რომ პატარა ელენემ დედის ცხოვრება საფუძვლიანად შეცვალა. ჭირვეული ბავშვი არ არის, ხშირად არ ტირის, ძალიან კონტაქტურია და ცოტა ღორმუცელაც, ღამით ძილშიც კი მიირთმევს. ნინი გვიამბობს, რომ ელენე დილაადრიან ხმებს გამოსცემს, რასაც ის სიმღერას უწოდებს.

ასე, რომ დილით მომღერალს ქალიშვილის სიმღერა აღვიძებს, პატარას აჭმევს, უმღერის ეთამაშება, შემდეგ კი მოსავლელად ბებიას, ეკა კახიანს უტოვებს, თვითონ კი ცოტა კიდევ სძინავს.
მომღერალი ერთ-ერთ ყველაზე პოპულარულ პროექტზე, "ცეკვავენ ვარსკვლავებზე" მუშაობს. ზოგჯერ სიმღერას არჩევს, ხანაც მონაწილეთა ჩაცმულობაზე ზრუნავს. როგორც თვითონ ამბობს, ყველაფერს მოდებულია პროექტში. ამის შემდეგ ნინი ინტერვიუზე, ჩაწერაზე და ათასი სხვა წვრილმანის მოსაგვარებლად გარბის. მომღერალი ცდილობს სახლში მალე მივიდეს და მისთვის უსაყვარლეს არსებას, ქალიშვილს ჩაეხუტოს, მოუაროს და ეთამაშოს.

ნინი ალბომზეც მუშაობს, რომლის პრეზენტაციაც რამდენიმე თვეში გაიმართება.

ინტერნეტსივრცეში ნინის ახალი კლიპი გავრცელდა, რომელშიც მომღერლის გარდა სხვა ცნობილი ადამიანებიც მონაწილეობენ. კლიპი სავარაუდოდ "საქართველოს რკინიგზის" სარეკლამო ვიდეორგოლია. "დასვენება მატარებლიდან იწყება-საქართველოს რკინიგზა"-ამ ფრაზით მთავრდება საკმაოდ მხიარული, ფერადი და ხალისიანი ვიდეორგოლი.

ვუსურვოთ ნინის წარმატებები და ბედნიერი მომავალი...