სულ ცოტა ხნის წინ მომღერალმა სოფო ნიჟარაძემ ჟურნალ რეიტინგს სასამართლოში უჩივლა. მიზეზი 26 მარტს ჟურნალ რეიტინგში სოფო ნიჟარაძის შესახებ გამოქვეყნებული პუბლიკაცია გახდა. სტატია მომღერლისა და საქართველოს პრეზიდენტის რომანს ეძღვნებოდა.სოფო ნიჟარაძის თქმით, სტატია სრულ ტყუილებზე იყო აგებული. თავზარდაცემული მომღერალი სოციალურ ქსელში წერდა: "ჟურნალი "რეიტინგის" სტატიასთან დაკავშირებით ბევრი წერილი მივიღე, ბევრი ცუდი, ბევრი კარგი, კრიტიკა და თანაგრძნობა! ჩემი პროფესია საზოგადოებრივ აზრთან პირდაპირ კავშირშია და გულწრფელად მაღელვებს თითოეული თქვენგანის აზრი, მითუმეტეს, რომ ყველგან დიდ სითბოს ვგრძნობ ჩემს მიმართ. ჟურნალში აღწერილი ყველა ეპიზოდი მთლიანად სიცრუეა, ასე რომ არა ჟურნალს და მითუმეტეს არა ამ სტატიის უნიჭო ავტორს, არამედ თვენ, ჩემო ძვირფასებო, გაგაგებინებთ სიმართლეს! არ გეგონოთ, რომ უყურადღებოდ დავტოვე ეს ფაქტი, ეს სტატუსი მხოლოდ დასაწყისია! დიდი მადლობა". მან დაპირება აასრულა და ჟურნალს სასამართლოში უჩივლა.
სოფო ნიჟარაძეს არ დაუკონკრეტებია რა ოდენობის კონპენსაციას მოითხოვს სასარჩელო განცხადებაში ჟურნალ "რეიტინგისგან", თუმცა მომღერალმა განმარტა, რომ თანხას საქველმოქმედო მიზნებისათვის გამოიყენებს.
"სამწუხაროდ, ამ ბოლო დროს გახშირდა მსგავსი სტატიები. სწორედ იმიტომ, რომ აქამდე ხმას არ ვიღებდი, თავს გავიდნენ მსგავსი ჟურნალები, სრულიად სიცრუეს ავრცელებენ და ეს სიცრუე გახდა მათი უმთავრესი საშუალება ჟურნალის გასაყიდად. ყველა ეპიზოდი, რაც ამ ჟურნალის მიერ დაბეჭდილ სტატიაში არის აღწერილი, არის სიცრუე და არც ერთი სიტყვა სიმართლეს არ შეესაბამება. მე მაქვს ჩემი სიმართლე და სწორედ ამ სიმართლის დასამტკიცებლად მივდივარ სასამართლოში", - განაცხადა სოფო ნიჟარაძემ. 
ჟურნალი "რეიტინგი" მომხდარ მოვლენებს სულაც არ შეუშინებია. ჟურნალმა კიდევ გამოაქვეყნა სტატია რიტორიკული სათაურით: "რატომ იცავს სოფო ნიჟარაძის ინტერესებს ბაჩო ახალაიას ადვოკატი?!" სტატიაში ხაზგასმულია სოფოს პრივილეგიები სხვა მომღერლებთან შედარებით, ისმის კითხვა რატომ სოფო და არა სხვა? ეს ყველაფერი როდია ჟურნალ "რეიტინგის" "facebook"-ის გვერდზე ვრცელდება შემდეგი განცხადებები: "რადგან სოფომ გადაწყვიტა, ამ საქმეს აფიშირება გაუკეთოს, "რეიტინგის" პასუხი შემდეგნაირია - ჩვენ აუცილებლად მოვითხოვთ სასამართლო სხდომის ღიად ჩატარებას, რათა მას დაესწროს ყველა მსურველი ჟურნალისტი, შესაბამისი აღჭურვილობით და ყველა დეტალი ჯეროვნად გააშუქოს. ასევე ჩვენი მოთხოვნაა, სასამართლოზე გამოცხადდეს თავად მომღერალი და კონკრეტული პასაჟები მოგვიხაზოს ჩვენი მასალიდან, რა არის მისთვის შეურაცხმყოფელი და მისი საქმიანი რეპუტაციის შემლახავი და როგორ მოქმედებს მის მრავალრიცხოვან კონტრაქტებზე, როგორც ეს ჩვენთან შეხვედრაზე მოსულმა მისმა ადვოკატმა გოგიტა გაბაიძემ განგვიცხადა, პირადი ცხოვრების აფიშირება." 
"ვინაიდან თავად გახსნა ეს თემა და პრესას მისცა უფრო მეტი საბაბი იმისთვის, რომ ამ თემაზე ვილაპარაკოთ, გამოვიდეს და გასცეს ერთ მთავარ შეკითხვას პასუხი: რატომ არის ის საქართველოში ბოლო წლების ყველაზე პრივილეგირებული მომღერალი? რატომ მიიღო მან, და არა სხვამ, მთავარი როლები სახელმწიფო ბიუჯეტის მიერ დაფინანსებულ მიუზიკლებში "ქეთო და კოტე" და "ვერის უბნის მელოდიები".
"კლიპები მომღერალ სოფო ნიჟარაძეს სახელმწიფომ გადაუღო, ვითომდა საქართველოს ცალკეული კუთხეების დასაპიარებლად, მაგრამ საინტერესოა, სხვა არავინ იყო ქართველ მომღერალთაგან, რომელიც ქუთაისს უკეთესად ან თუნდაც უარესად უმღერებდა, ვიდრე სოფო? ან სოფო ნიჟარაძეს უფრო მეტად უყვარს საქართველოს ყველა კუთხე-კუნჭული, ვიდრე სხვა მომღერლებს?"
ფაქტი ერთია, რაც მთავრობა შეიცვალა სოფოსა და საქართველოს პრეზიდენტის რომანზე ჟურნალებმა აქტიურად დაიწყეს წერა. საინტერესოა, რატომ არ ეხებოდნენ ამ თემას "ნაციონალური მოძრაობის" მმართველობის პერიოდში?
