რამდენიმე დღის წინ იუსტიციის მინისტრს თეა წულუკიანს წერილით მიმართა სამართლის დოქტორმა, პროფესორმა ბიძინა სავანელმა, რომელიც თავის მიმართვაში ბრალს დებს საქართველოს პრეზიდენტს ქვეყნის ღალატში, რაც რუსეთთან, თურქეთთან და სომხეთთან ფარულ შეთანხმებებში გამოიხატება.

როგორც სავანელი წერილში აღნიშნავს, რუსეთთან ფარული შეთანხმებით ქვეყნის მნიშვნელოვანი სტრატეგიული ობიექტები პრეზიდენტმა რუსულ კერძო კომპანიებს მიჰყიდა, სამხრეთ ოსეთის ავტონომიური ოლქი აღადგინა, მას კი ახალგორი მიუერთა, იგივე ქმედება ჩაიდინა როცა კოდორის ხეობაში სვანები განაიარაღა და კოდორი აფხაზეთს შეუერთა.მისივე
განმარტებით, სააკაშვილმა თურქეთთან ფარული შეთანხმებით აჭარაში 30 ათასი თურქი ჩაასახლა და მეჩეთი გაამრავლა, რაც თურქეთისგან აჭარის ისლამიზაციას და ეკონომიკურ, პოლიტიკურ ოკუპაციას გულისხმობს.

ხოლო რაც შეეხება სომხეთს, სავანელის თქმით, სამცხე-ჯავახეთში ეთნიკური კონფლიქტის წამოწყება სხვა არაფერია, თუ არა სომხეთის მხრიდან ახლად შეიარაღებული ჯარის შემოყვანა ჯავახეთში, შემდეგ 1919 წლის ანალოგიური მოძრაობის წამოწყება თბილისის მიმართულებით. ამ ფაქტს პარლამენტის ქუთაისში გადატანით ამყარებს წერილის ავტორი.

ზემოთ ჩამოთვლილი ბრალდებებიდან პროფესორი სავანელი თავისი პროფესიული ლოგიკიდან გამომდინარე, თხოვნით მიმართავს იუსტიციის მინისტრს, -" აღიძრას სისხლის სამართლის საქმე მიხეილ სააკაშვილის მიმართ სახელმწიფო ღალატისათვის, დაუყოვნებლივ აყვანილი იქნას პრეზიდენტი პატიმრობაში და საქმე პატიმართან ერთად გადაეცეს ჰააგის სასამართლოს განსახილველად".

უცნაურად და არასერიოზულად მიმაჩნია სავანელის მიმართვა წულუკიანის მისამართით, რასაც მიმყარებს პრემიერის მიერ გაკეთებული განცხადებები, როცა მან აქცენტები გააკეთა ყოფილ პრეზიდენტებზე და ჩემი აზრით, თუკი საზოგადოებას ასეთი დამოკიდებულება ექნება პოზიცია-ოპოზიციის მიმართ, თუკი წარსულის შეცდომებსა და დანაშაულზე დიდხანს გაგრძელდება პოლიტიკური შოუები და საქმე არ გაკეთდება, მაშინ არანაირ კოჰაბიტაციაზე არ უნდა ვიფიქროთ, რაც ისევ და ისევ ქართველ ხალხს და ქვეყანას დააზარალებს.