2005 წლის 3 თებერვალს, 9 საათზე, საქართველოს შინაგან საქმეთა მინისტრმა ვანო მერაბიშვილმა ქვეყანას პრემიერ-მინისტრ ზურაბ ჟვანიას გარდაცვალების თავზარდამცემი ამბავი ამცნო. მას შემდეგ 8 წელი გადის და ეს ამბავი ისევ ბუნდოვანია. როგორც ვარაუდობდნენ ზურაბ ჟვანიას მკვლელობა მაშინ იქნებოდა გამოძიებული, როდესაც ახალი მთავრობა მოვიდოდა. აი დადგა ეს დრო და ხელისუფლებაში ახალი მთავრობა მოვიდა. როგორც გაირკვა, საქართველოს მთავარი პროკურატურა, პირველ რიგში, ზურაბ ჟვანიას გარდაცვალების ბურუსით მოცულ საქმეს შეისწავლის. პრემიერ-მინისტრის გარდაცვალებასთან დაკავშირებით დღემდე არაერთი ინფორმაცია გავრცელდა. ითქვა, რომ ზურაბ ჟვანია შავნაბადაზე მოკლეს, გვამი კი საბურთალოს ქუჩაზე მიიტანეს. ისიც გავიგეთ, სააკაშვილმა პრემიერ-მინისტრს საფერფლე ესროლა და შემთხვევით შემოაკვდაო. გამოძიებას შეიძლება ჟვანიას ყოფილი გუნდის წევრი ხათუნდა ხოფერია დაეხმაროს. ხათუნა ხოფერიამ განაცხადა, რომ იცნობს ადამიანს, რომელსაც ქონების დათმობას აიძულებდნენ და წამების დროს ერთ-ერთი მაღალჩინოსანი დაემუქრა, ამ ხელებით დავახრჩვე ჟვანია და შენ რისი იმედი გაქვსო? მკვლელობის ძველ ვერსიებს დახრჩობის ვერსიაც დაემატა. ხოფერიას განცხადებით გამოძიებას ის დაუსახელებს ამ პიროვნების ვინაობას. ზურაბ ჟვანია ღირსეული ადამიანი იყო. მას სწამდა დემოკრატიისა და პლურალიზმის ძალის და როლის. ის იყო მგზნებარე, მაგრამ ყოველთვის გონიერების ხმა. ზურაბ ჟვანიას ერთ-ერთი რეალური დემოკრატიული მემკვიდრეობა საქართველოს პარლამენტია. სწორედ ის იყო მისი სტრუქტურის, წესებისა და ჩვეულებების მთვარი არქიტექტორი. მისი გარდაცვალება დიდი დანაკარგი იყო საქართველოსთვის და ქართული დემოკრატიისთვის. დღეს ჩვენ ზურაბ ჟვანიას მივესალმებით იმისთვის, რაც იყო და იმისთვის, რაც ყოველთვის იქნება - მაგალითი მათთვის, ვისაც დემოკრატიისა და თავისუფლების სწამს.