ახალი წელი განსაკუთრებული დღესასწაულია, ამიტომ ყოველთვის გვსურს უჩვეულოდ და კომფორტულად გავატაროთ. ბევრისთვის კომფორტი ასოცირდება მომსახურებასთან და დახვეწილობასთან. მომსახურების მაღალი დონის დამფასებლები კითხვაზე, სად შევხვდეთ ახალ წელს, პასუხობენ – რა თქმა უნდა, ევროპაში.

ევროპის ქვეყნებში შეგიძლიათ ბიუჯეტური დასვენება მოიწყოთ და კარგი მომსახურებაც მიიღოთ. მოგზაურობა დამოუკიდებლად შეგიძლიათ დაგეგმოთ ან პროფესიონალების მიერ ორგანიზებული ტური შეიძინოთ. მხოლოდ თქვენ ირჩევთ, ჩვენ კი გთავაზობთ ევროპის ულამაზეს ქალაქებს, სადაც ღირს გაფრენა 2024 ახალი წლის აღსანიშნავად.

პრაღა

ჩეხეთში ახალ წელს უწოდებენ წმინდა სილვესტრის დღეს ქრისტიანული მქადაგებლის პატივსაცემად, რომელიც რომის პაპი გახდა. ითვლება, რომ ამ დღეს სუფრაზე საუკეთესო საჭმელია გამომცხვარი კობრი ოსპით, რომელსაც იღბალი მოაქვს. პრაღაში ეს კერძი საახალწლო კერძებს შორის საამაყო ადგილს იკავებს.

პრაღაში საახალწლო ზეიმები იმართება ცენტრალურ მოედანზე, სადაც მთავარი ნაძვის ხე იდგმება, და ვაცლასის მოედანზე. ახალი წლის ღამეს პრაღის ძველ ქუჩებში სეირნობა სასიამოვნოა.

ახალი წლის დადგომისას ფეირვერკების გაშვება მიღებული არაა. ფეიერვერკის დრო მოდის 1 იანვრის საღამოს. თავისი სიკაშკაშით და ხანგრძლივობით მსოფლიოს სხვა მსგავს შოუებს აღემატება.

პრაღელებს აქვთ ერთი ცრურწმენა, რომ თუ ახალი წლის ღამეს ასტრონომიულ საათთან დადგებით, 12 ჩამორეკვაზე მიულოცავთ 12 ადამიანს და შამპანურით გაუმასპინძლდებით, მთელი წელი ბედნიერები იქნებით და ყველა სურვილი აგისრულდებათ.

პარიზი

პარიზი ახალ წელს ტურისტებს მთელი თავისი ბრწყინვალებით ხვდება. პარიზის ყველა შენობა, ყველა კუთხე განათებით მორთულია. ყველაფერი ბრწყინავს და კაშკაშებს. ნამდვილი თოვლის არარსებობის პირობებში ხეები ქუჩებსა და პარკებში ხელოვნური თოვლით იფარება. ბევრ მორთულ ნაძვის ხეს ვერ ნახავთ, რადგან ფრანგებისთვის უფრო ტრადიციულია მადონას და ბავშვის ფიგურები და შობის სცენები.

მთავარი ზეიმი ტარდება ელისეს მინდვრებზე, სადაც თავად პარიზელებს უყვართ შეკრება. აქ იმართება ბაზრობები და მასკარადები. აქვე უშვებენ ფეირვერკებს. დახლებთან ყიდიან პარიზელთა საყვარელ სადღესასწაულო საკვებს: შემწვარი წაბლი და ტკბილი ნამცხვრები. ყველგან ცხელი გლინტვეინი იყიდება.

ხოლო თავისუფლების მოედანზე ყოველ ახალ წელს იდგმება უზარმაზარი ეშმაკის ბორბალი, საიდანც მოსახერხებელია სადღესასწაულოდ მორთული ღამის პარიზის ნახვა.

რიგა

რიგაში ახალი წელი ხალხური ტრადიციების წარმოჩენის დროა. ქალაქში შეგხვდებათ მრავალფეროვანი დეკორაციები და განათებები, მაგრამ არაფერია უფრო დასამახსოვრებელი, ვიდრე ხელნაკეთი ნამუშევრები, რომლებიც თითოეულ შენობას ამშვენებს. რიგის ყველა მაცხოვრებელი ცდილობს თავისი დაწესებულების ან სახლის მოწყობას თავისებურად. შედეგად, ქალაქი იქცევა ხალხური ხელობის მუზეუმად სადღესასწაულო დღეებში.

მთავარი საახალწლო ნაძვის ხე იდგმება რატუშის მოედანზე. აქ უშვებენ მთავარ საახალწლო ფეირვერკებს. თუმცა ნაძვის ხეები ქალაქის ყველა მოედანზე დგას და შეგიძლიათ იქ აღნიშნოთ, სადაც გსურთ, ყველგან მხიარულება და სიფერადეა. საახალწლო ბაზრობები, რომლებიც სხვადასხვა მოედანზე იმართება, არ უნდა გამოგრჩეთ.

ყველაზე დასამახსოვრებელი საახალწლო სუვენირები, რომლებიც შეგიძლიათ ლატვიიდან ჩამოიტანოთ, იგივე ხელნაკეთი ნაწარმი იქნება. თითოეულ ბაზრობაზე შეგიძლიათ შეიძინოთ მრავალი ხელნაკეთი სუვენირი, რომელიც მორთულია ეროვნული ორნამენტებითა და სიმბოლოებით.

ტალინი

გაატარო ახალი წელი ტალინში ნიშნავს ჩაიძირო ნამდვილი შუა საუკუნეების ატმოსფეროში. ქალაქმა შემოინახა არა მხოლოდ შუა საუკუნეების იერსახე, არამედ შუა საუკუნეების ტრადიციებიც. მაგალითად, საახალწლო კერძები მზადდება მკაცრად ძველი რეცეპტების მიხედვით, შექმნილი მაშინ, როდესაც ჯერ არ იყო კარტოფილი: ქერისგან, ოსპისგან, თალგამურისგან.

მთავარი ნაძვის ხე იდგმება ცენტრალურ რატუშის მოედანზე. იქვე არის ესტონელი თოვლის ბაბუას, იულუვანას სახლი. დღესასწაულის დროს სახლიდან გამოდის და ზეიმში მონაწილეობს. ერთგული ირმებიც მის გვერდით არიან. აქვე იდგმება დიდი საციგურაო მოედანი, სადაც ახალ წელს განსაკუთრებით სახალისო და საინტერესოა. ღია ცის ქვეშ იმართება თეატრალური წარმოდგენები, რომლებშიც მაყურებელს მონაწილეობის მიღება შეუძლია.

ლონდონი

რელიგიური ლონდონელებისთვის ზამთრის მთავარი დღესასწაული შობაა, ოჯახური დღესასწაული. თუმცა უშუალოდ ახალ წელს ატარებენ ქუჩებსა და მოედნებზე ხმაურიან, მხიარულ კომპანიებში.

მთავარი ნაძვის ხე იდგმება ტრაფალგარის მოედანზე. აქ იმართება ძირითადი ზეიმი, ფეიერვერკი, სადღესასწაულო აღლუმი. აქ ლონდონის საახალწლო ატმოსფეროს ყველაზე უკეთ შეიგრძნობთ.

არ მოიწყენთ ლონდონის სასტუმროებშიც, რადგან თითოეული მათგანი თავის გასართობ პროგრამას ამზადებს დღესასწაულისთვის. ტრადიციული საახალწლო სამზარეულოს დასაგემოვნებლად ერთ–ერთ რესტორანს შეგიძლიათ ეწვიოთ. ასევე შეგიძლიათ აირჩიოთ კრუიზი, რომ ღამით შემოუაროთ განათებებით მორთულ ლონდონს.

ბარსელონა

ბარსელონაში ახალ წელს კაშკაშად და კრეატიულად აღნიშნავენ. რამბლას მოედანზე ადგილობრივებს და ტურისტებს ხვდებიან ცოცხალი ქანდაკებები, ჟონგლერები და მიმები. ისინი აჩვენებენ მრავალფეროვან სადღესასწაულო ნომრებს, რომლებიც ამაღლებს განწყობას.

მთავარი დღესასწაული იმართება მონჟუიკის მთაზე მომღერალი შადრევნების მახლობლად. იქვე მრავალი წელია იმართება ტექნოლოგიური შოუები, რომლებშიც მთავარი ელემენტია დიდი რობოტული ობიექტები. სინამდვილეში, მათ შიგნიდან ადამიანები აკონტროლებენ, მაგრამ ისინი ზემძლავრ ტექნიკურ გაჯეტებს ჰგვანან. პარალელურად, აგბარის მაღალსართულიან კოშკზე ტარდება მრავალსაათიანი სინათლის შოუ: საოცარი გამოსახულებები ერთმანეთის მიყოლებით იცვლება კოშკის სარკიან ზედაპირზე.

საახალწლო ქუჩის წვეულებები იმართება ესპანურ სოფელში, ღია ცის ქვეშ არქიტექტურულ მუზეუმში. აქ ეწყობა ხმაურიანი საცეკვაო წვეულებები და დისკოთეკები. ასევე შეგიძლიათ გაატაროთ ახალი წელი მთავარ საციგურაო მოედანზე, რომელიც სპეციალურად არის მორთული ზღაპრული მოტივებით.

ბერლინი

ახალი წელი ბერლინში არის მუსიკა, ცეკვა და გართობა. ბევრი ლუდი და ბავარიული სოსისი, რადგან გერმანელები ახალ წელსაც საყვარელი ტრადიციების ერთგული რჩებიან.

დღესასწაულის მთავარი ადგილია მოედანია ბრანდენბურგის კარიბჭესთან. იქ იკრიბებიან დამსვენებლები, აქ სვამენ პუნჩს და გლინტვეინს და აქ ახალი წლის დადგომისას უშვებენ ფეიერვერკებს. შემდეგ დილამდე გართობის დროა.

ახალი წელი ბერლინში სრულიად მოულოდნელ გარემოში შეგიძლიათ აღნიშნოთ – შუა საუკუნეების შპანდაუს ციხესიმაგრეში, სადაც ყოველწლიურად რაინდული შოუ იმართება: ტურნირი, მეჯლისი და შუა საუკუნეების კერძების ვახშამი.

ბერლინის ბაზრობები გთავაზობთ უჩვეულო და განუმეორებელ საახალწლო სუვენირებს: ნაძვის ხის ხელით მოხატული სათამაშოები, რომლებიც პირდაპირ ტურისტების თვალწინ მზადდება.

მიუნხენი

გერმანული ეროვნული ტრადიციების დაცვით ბერლინს არ ჩამოუვარდება მიუნხენი. ბევრ ტურისტს იზიდავს ქალაქის ძველი არქიტექტურა თავისი ზღაპრული იდუმალებით, რომელიც იდეალურად შეესაბამება საახალწლო ჯადოქრობას.

ქალაქში ბევრი კოსტიუმერებული წარმოდგენა იმართება, რომელთა პერსონაჟებიც სცენიდან პირდაპირ ქუჩაში გადიან. ყველგან შეხვდებით რაინდებს, მუსიკოსებს, მოხეტიალე მსახიობებს და ლამაზ ქალებს შუა საუკუნეების სამოსში. და ეს ყველაფერი კლასიკური მუსიკის ფონზე, რომელიც განსაკუთრებით უყვართ მიუნხენში.

ვენა

როგორც პრაღაში, აქაც საახალწლო დღესასწაულს წმინდა სილვესტრის დღეს უწოდებენ. ახალი წელი ავსტრიის დედაქალაქში მასობრივი ზეიმის, კომუნიკაციის და სხვადასხვა გართობის დროა.

ძირითადი სადღესასწაულო ღონისძიებები იმართება ძველ ქალაქში, სადაც იკრიბებიან როგორც ადგილობრივები, ასევე ტურისტები. აქ იდგმება ბევრი სავაჭრო დახლი და ღია სცენა. კარვებში მიირთმევენ პუნჩს და შამპანურს, ყიდიან ტკბილ ცომეულს და სხვადასხვა სასუსნავს. სცენიდან ისმის მუსიკა კლასიკურიდან როკამდე, გამოდიან პოპულარული არტისტები და შოუმენები.

ტრადიციის თანახმად, ვენის ოპერა ამ დღეს უზარმაზარ ეკრანზე უშვებს ცნობილ ვენურ ოპერეტას "Die Fledermaus". ჰოფბურგისა და რატუშის მოედნებზე საახალწლო მეჯლისი იმართება. საახალწლო ზეიმის მთავარი ნაწილია ვენის ფილარმონიული ორკესტრის ბრწყინვალე კონცერტი.

ამსტერდამი

ამსტერდამში საახალწლო და საშობაო განათებები ორი თვე გრძელდება და შუქების ფესტივალს უწოდებენ. განათებებით მორთული შენობები ელეგანტურად და საზეიმოდ გამოიყურება. ასეთი სილამაზის უკეთ დასათვალიერებლად ტურისტები საათობით დადიან ამსტერდამის ქუჩებში.

ამსტერდამში მოულოდნელი საახალწლო ტრადიცია არსებობს: პირველ იანვარს ადგილობრივები, ზოგჯერ რისკიანი ტურისტები ჩრდილოეთის ზღვაში ბანაობენ. არსებობს რწმენა, რომ ვინც ამ გამოცდას გაივლის, მთელი წელი წარმატებული იქნება.

ჰელსინკი

თუ გავიხსენებთ, რომ ფინეთი ლაპლანდიური თოვლის ბაბუას სამშობლოა, მაშინვე ცხადი ხდება, რომ ჰელსინკში საახალწლო ზღაპარი დაგხვდებათ.

მთავარი დღესასწაულები იმართება სენატის მოედანზე. უკვე დილით მშვიდი ფინელები სახლებში მიდიან, ამიტომ პირველ იანვარს ქალაქი ცარიელია. სამაგიეროდ ტურისტებს ბევრი შესაძლებლობა აქვთ, რომ ქალაქის ღირსშესანიშნაობები შეისწავლონ.

ათენი

საახალწლოდ ბერძნული სახლების მთავარი დეკორაციაა ნავი, ამიტომ აუცილებლად არის ნებისმიერ სახლში ნაძვის ხესთან ერთად. ნათელი, განათებული ნავები შეგიძლიათ ნახოთ საბერძნეთის ყველა ქუჩასა და მოედანზე. განსაკუთრებით ბევრია ათენში. ეს სიმბოლიზმი შემთხვევითი არ არის, რადგან ზღვა ტრადიციულად საბერძნეთის ხალხის მარჩენალი იყო.

მთავარი ნაძვის ხე ათენში სინტაგმის მოედანზეა იდგმება. მის გვერდით მოთავსებულია სადღესასწაულო განათებებით მორთული ნავიც. აქვე სადღესასწაულო კონცერტები იმართება. ბერძენი თოვლის ბაბუა, წმინდა ბასილი, ყველას ულოცავს დღესასწაულს. სტუმრები საახალწლოდ არაჩვეულებრივი გართობითაც ისიამოვნებენ, ვირებით გასეირნება.

რომი

რომში მთავარი ზეიმი ტარდება პიაცა დელ პოპოლოს მოედანზე. წინასაახალწლო შეკრების შემდეგ რომის მაცხოვრებლები აქ იყრიან თავს. აქვე იწვევენ ქალაქის სტუმრებს. რომაელები მეგობრულები არიან და მათი კეთილგანწყობა პიკს აღწევს ახალ წელს, რადგან ცრურწმენის მიხედვით, ამ დღეს ნაცნობობას წარმატება მოაქვს. ტრადიცია მხიარულობას ზრდის.

მთავარ მოედანზე ათ საათამდე იკრიბებიან, რადგან მოგვიანებით შესასვლელი იკეტება და ზეიმი იწყება. შუაღამით სვამენ შამპანურს და ტრადიციულად ფლამინიუსის ობელისკის ძირში ბოთლებს ამტვრევენ, რასაც ადგილობრივი რწმენით მომავალ წელს წარმატება მოაქვს.

სტოკჰოლმი

სტოკჰოლმში საახალწლო დღესასწაულების საყვარელი ადგილია ღია ცის ქვეშ მოწყობილი სკანსენის მუზეუმი. ეს არის შვედეთის მინიატურული მოდელი. სკანსენის თითოეული ქუჩა შვედეთის ცალკეული ქალაქის სიმბოლოა და სხვადასხვა დროსაც წარმოაჩენს. აქ შეგიძლიათ ნახოთ შვედეთის ისტორიის ყველა ეტაპი შუა საუკუნეებიდან დღემდე. შეგიძლიათ მიირთვათ დელიკატესები, რომლებსაც ამზადებენ შუა საუკუნეების რეცეპტების მიხედვით.

ახალი წლის ღამეს სტოკჰოლმში სადღესასწაულო სალუტი ჭექს. შვედებს უყვართ ფეიერვერკი, ამიტომ სიამოვნებით ეძებენ ადგილებს, სადაც სანახაობა საუკეთესოდ გამოჩნდება და სტუმრებს იქ ეპატიჟებიან.

ვარშავა

ვარშავაში მთავარი საახალწლო ნაძვის ხე იდგმება სასახლის მოედანზე, მაგრამ ქალაქელებისთვის საყვარელი ადგილია ბაზრის მოედანი. სწორედ აქ უშვებენ ფეიერვერკებს ახალი წლის ღამეს. აქ იკრიბებიან ადგილობრივები და ტურისტები, რომ ერთმანეთს ახალი წელი მიულოცონ და ბედნიერება უსურვონ. შემდეგ კი რესტორნებში და კაფეებში მიდიან და ქეიფს დილამდე აგრძელებენ. სასახლის მოედანზე შუაღამით ქუჩის მუსიკოსები გამოდიან. სასიამოვნო მუსიკა და ჯანჯაფილის სახლები – რა შეიძლება იყოს უფრო მშვენიერი ახალი წლის ღამეს?

ევროპაში წასვლა ღირს ახალი შთაბეჭდილებების მისაღებად. სადაც არ უნდა წავიდეს ტურისტი ევროპაში და რომელი ქვეყანაც არ უნდა მოინახულოს, ყოველთვის შეხვდება უნიკალურ ევროპულ ტრადიციებს და სტუმართმოყვარე ევროპელებს, რომლებმაც იციან და უყვართ მასშტაბურად აღნიშვნა. საახალწლო ტური ევროპაში შესანიშნავი იდეაა.

ასევე დაგაინტერესებთ:

1. მსოფლიოს ყველაზე ლამაზი ქალაქები ახალი წლის მოლოდინში

2. იდეები მოგზაურობისთვის, რომლებიც ცხოვრებაში ერთხელ მაინც უნდა გამოცადოთ

3. 18 რამ რისი გაკეთებაც სხვა ქვეყანაში მოგზაურობის დროს არ ღირს

4. მოგზაურ-ბლოგერი ნებისმიერ ქვეყანაში იაფად მოგზაურობის საიდუმლოს გიზიარებთ

5. რომელ ადგილებს არ უნდა შეეხოთ თვითმფრინავში?

6. 24 წარმოუდგენელი სასტუმრო, სადაც მოხვედრას ახლავე ისურვებდით

7. როგორ მუშაობს ტუალეტი თვითმფრინავში ან რატომ არ შეიძლებოდა ადრე ცისფერი ყინულის ჭამა

8. 12 რამ, რაც ფრენის წინ არ უნდა გააკეთოთ

9. იმოგზაურე მარტივად - 20 საუკეთესო გადაწყვეტილება ბევრი ნივთის ჩემოდანში ჩასატევად

10. მსოფლიოში ყველაზე ლამაზი საზოგადოებრივი ტუალეტი - გამოსვლა არ მოგინდებათ

უფრო მეტი იხილეთ აქ: Yoona-ს არხი