საზოგადოება "80-იან წლებში დატრიალებულ ტრაგედიას სულ სხვა ფაქტობრივი გარემოებები ჰქონდა" - მაია შენგელია 2022, 16 ოქტომბერი, 11:26
ქართულ მედიაში გავრცელდა მარიამ გელაშვილის პოსტი, სადაც წერს, რომ ვაკის პარკის მომხდარმა ტრაგედიამ 1984 წელს თბილისის ზღვაზე მოხდარი ტრაგედია გაახსენა, რომელსაც 18-19 წლის სამი ახალგაზრდის სიცოცხლე შეეწირა.
"ამ საშინელებამ, რაც მოხდა, ყველას 1984 წელს თბილისის ზღვაზე დატრიალებული ტრაგედია გაგვახსენა. მაშინაც წყალში დენის არსებობით სამი არაჩვეულებრივი ბიჭი გარდაიცვალა, ჩემი სკოლელები, ისინიც 55-ელებია, ჩემი პარალელური კლასელი კახა ჩხაიძე, მისი ძმა გოგიტა და გოგლიკა ჩოგოვაძე. ერთმანეთის საშველად ხტებოდნენ იახტიდან წყალში და… 19-20 წლის ბიჭები ვიღაცის უპასუხისმგებლობას შეეწირნენ... არც მახსოვს, მაშინ ვინმე თუ დაისაჯა. ალბათ არა, თორემ გამახსენდებოდა, არ ვიცი… ახლაც გამიახლდა ის საშინელი განცდა და სულის შემხუთავი ტკივილი… ანგელოზივით ბავშვი… ღმერთო ჩემო... მთელი ჩემი ბავშვობის მოგონებებით სავსე ვაკის პარკში ასე მგონია, ვეღარასოდეს შევალ… არადა, სულ ცოტა ხნის წინ ვიყავი ნუცასთან, ჩემს შვილიშვილთან ერთად, როგორ მომეწონა, ერთი სული მქონდა ბოლომდე როდის დამთავრდებოდა… ეს რამხელა ტრაგედია დატრიალდა, “ - წერდა "ფეისბუქის" პირად გვერდზე ინტერნეტმომხმარებელი მარიამ გელაშვილი. მალევე მის პოსტს გამოეხმაურა ფეისბუქით მაია შენგელია, რომელიც აღნიშნავს, რომ ამ საქმეს კარგად იცნობს და იმ ბიჭების დაღუპვა სულ სხვა ფაქტორმა გამოიწვია: "არ შემიძლია არ გამოვეხმაურო ამ სტატიას. საქმე იმაშია, რომ 80-იან წლებში დატრიალებულ ტრაგედიას სულ სხვა ფაქტობრივი გარემოებები ჰქონდა და მიზეზთა და მიზეზთა გამო კარგად ვიცნობ ამ საქმეს. თბილისის ზღვა ორ ნაწილად იყოფა. ერთი ჩვეულებრივ ის ნაწილია, რომელსაც ყველა ჩვენგანი იცნობს, ხოლო მეორე, ე. წ. პატარა ზღვა, წარმოადგენს თბილისის წყლის რეზერვუარს, სადაც შესვლა და ბანაობა აკრძალულია. ეს ორი ნაწილი ერთმანეთს ძალიან ვიწრო სრუტით უკავშირდება. ახალგაზრდები იყვნენ იახტით. მათ რატომღაც მოინდომეს ე. წ. პატარა ზღვაში შესვლა, რაც იახტით შეუძლებელი იყო. ამიტომ იახტა ხელში აიყვანეს და ისე მოინდომეს დიდი ზღვიდან პატარა ზღვაში მისი გადაადგილება. ამ დროს იახტის ანძა გამოედო მაღალი ძაბვის ხაზს, რომელიც გადიოდა პატარა ზღვის თავზე და რადგან იქ ვინმეს შესვლა აკრძალული იყო, წესით იმ ადგილას არავინ არ უნდა მოხვედრილიყო. ანძამ გაგლიჯა მაღალი ძაბვის სადენი და იგი წყალში ჩავარდა. როგორც უკვე ვთქვი ამ ორ ზღვას ძალიან მცირე ყურე აკავშირებთ, ამიტომ ვინც ხმელეთზე იდგა, ის გადარჩა, დანარჩენები კი დაიღუპნენ. მართლაც დიდი ტრაგედია დატრიალდა, მაგრამ რეალური გარემოებები იმდაგვარი იყო, რომ მხოლოდ ტექნიკური სამსახურები ვერ დადანაშაულდებოდნენ. სამწუხაროდ აკრძალვა, რომ ე, წ. პატარა ზღვაში გადასვლა არ შეიძლებოდა, ახალგაზრდებმა არ გაითვალისწინეს. ეს აკრძალვა დღესაც მოქმედებს თბილისის ზღვაზე. მწუხარება ისეთი რამაა, რომ ხშირად ობიექტურობას გვაკარგვინებს. თუ გახსენებაა, მაშინ ობიექტური გარემოებანი სრულად უნდა გავიხსენოთ", - წერს მაია შენგელია. 108 3-ს მოსწონს
|