რუსეთის მოსახლეობა 2018 წლის აღწერის თანახმად 144 მილიონი ადამიანისგან შედგება. ანუ ჩვენი ჩრდილოელი მეზობელი მოსახლეობის რაოდენობით დაახლოებით 35-ჯერ აღემატება საქართველოს. აქედან 2-3%-მაც რომ მოიწადინოს საქართველოში საცხოვრებლად გამომგზავრება, ესეც კი უდიდეს პრობლემას შექმნის ჰუმანიტარული თვალსაზრისით. გარდა იმისა, რომ არსებობს რეალური საშიშროება, რომ ძალიან ახლო მომავალში საკუთარ ქვეყანაში უმცირესობაში აღმოვჩნდებით, მეორე არანაკლები სიმწვავის საფრთხე შემდგომში მდგომარეობს: საქართველოს ფიზიკურად არ შეუძლია ამდენი მიგრანტის შენახვა! რუსეთის მილიონობით მოქალაქე უზარმაზარ პრობლემებს შეუქმნის ჩვენი ქვეყნის ეკონომიკას; მაქსიმუმამდე გაძვირდება საკვები, სასმელი და ელემენტარული საყოფაცხოვრებო პროდუქტები; დაკარგავენ რა უკანასკნელ საარსებო საშუალებებს, რუსეთის მოქალაქეები დაიწყებენ ჩვენი ბინების ძარცვას; არნახულად გახშირდება ყაჩაღობა და კრიმინალი; ქუჩაში მცხოვრები რუსი უსახლკაროების ყურება, რომლებიც თავების გადასარჩენად არაფერზე არ დაიხევენ უკან, ჩვენი ყოველდღიურობა გახდება; ქვეყანაში ხელფასები მინიმუმამდე დაეცემა და დიდ ამბად გადაიქცევა, იმხელა ანაზღაურება მაინც თუ გვექნება, რომ ჩვენვე თავები გადავირჩინოთ; ყველაფერი წარსულს ჩაბარდება, რაზეც აქამდე ვოცნებობდით: ევროინტეგრაციაც, უსაფრთხო და დაცულ გარემოში არსებობაც და ტერიტორიული მთლიანობის აღდგენის პერსპექტივებიც.

ეს ყველაფერი აპოკალიფტური ფილმის სცენარს ჰგავს, მაგრამ ეს სცენარი თანდათან რეალობის კონტურებს იძენს, რადგან მხოლოდ გასულ კვირას ჩვენს ქვეყანას რუსეთის 100 ათასი მოქალაქე ეწვია, შემოსულების რიცხვი კი კლების ნაცვლად სულ უფრო მატულობს და მატულობს.

განგაშის ზარები დროზე თუ არ შემოვკარით და ხელისუფლებას თუ არ მოვთხოვეთ, რომ რუსეთთან საზღვარი სასწრაფოდ ჩაკეტოს, თვით ყველაზე უარესი სცენარიც კი ყოველდღიურ რეალობად გადაგვექცევა.

ბალტიისპირეთის ქვეყნებმა ჩაკეტეს საზღვარი რუსეთთან. ლიეტუველებმა, ლატვიელებმა და ესტონელებმა ეს იმიტომ გააკეთეს, რომ საკუთარი ქვეყნების უსაფრთხოებაზე ზრუნავენ.

და ჩვენ ვზრუნავთ საკუთარი ქვეყნის უსაფრთხოებაზე?

ჩვენ ბალტიისპირეთს უნდა მივბაძოთ! მათ გზას უნდა დავადგეთ! ჩვენ ერთად მოვიპოვეთ დამოუკიდებლობა და ყოველთვის ერთად უნდა ვიყოთ! ძალიან დიდი ხნის წინათვე ბალტიისპირეთის ქვეყნებთან ერთად უნდა ვყოფილიყავით და მათთან ერთად უნდა გავმხდარიყავით ევროკავშირის და ნატოს წევრი სახელმწიფო. არც ახლა არის გვიან, რომ მათ გზას დავადგეთ. უბრალოდ, კისრიდან უნდა გადავიგდოთ ეს საშინელი უღელი საქართველოს დღევანდელი პრორუსული ხელისუფლების სახით. წინააღმდეგ შემთხვევაში არანაირი მომავალი ჩვენ არ გვიწერია.