„კობახიძემ კონკრეტულად დაასახელოს გვარები იმ ოპოზიციონერი დეპუტატების, ვინც დადიოდა დერეფნებში და აწარმოებდა აგიტაციას ევროკავშირში საქართველოს კანდიდატობის წინააღმდეგ და მოიტანოს მტკიცებულებები ამ ბრალდებების, რადგან კობახიძე და „ქართული ოცნება“ მიეჩვია ტყუილების რახარუხს პრესკონფერენციებზე მტკიცებულებების გარეშე და თუ ამის მტკიცებულებას არ მოიტანს, მოვითხოვ საჯაროდ ბოდიში მოუხადოს ყველა ოპოზიციონერს“, -განაცხადა საპარლამენტო ოპოზიციის წევრმა გიორგი ვაშაძემ პარლამენტის პლენარულ სხდომაზე პოლიტიკური განცხადებების ფორმატში გამოსვლისას.

მისი თქმით, არ შეიძლება ქვეყანას მართავდეს პოლიტიკური ძალა, რომლის თავმჯდომარე მუდმივად ტყუილების ტირაჟირებას და პროპაგანდას ახდენს.

„როგორც ჩანს, საქმის აღძვრას აპირებენ ამერიკის ელჩის წინააღმდეგ, აშანტაჟებენ მოსამართლეებს ისე, რომ თუ ვინმე გაბედავს იმ პროგრამაში წასვლას ის სერიოზულად დაიტუქსება იმ ძალადობრივ-კრიმინალური რეჟიმით, რომელიც გაქვთ სასამართლოში კლანის სახით ჩამოყალიბებული და რომელიც აშანტაჟებს მოსამართლეებს, ოჯახებში უვარდება მოსამართლეებს და თვითმკვლელობამდე მიჰყავს მოსამართლეები და ამის მტკიცებულებებს მალე ნახავთ თქვენ და რაც მთავარია, ბოიკოტს უცხადებენ ამერიკას“, განაცხადა გიორგი ვაშაძემ. მისი თქმით, ამერიკელები ამბობენ, რომ კაპიკ დაფინანსებას ვერ მიიღებს ის ადამიანი აშშ-სგან, რომელიც ანტიდემოკრატიულად იქცევა, კანონის უზენაესობას არ აღიარებს, სასამართლოში კლანს განამტკიცებს", - განაცხადა გიორგი ვაშაძემ.