ქალთა უფლებადამცველი ბაია პატარაია სოციალურ ქსელში წერს, რომ გამარჯვების სინონიმებად ხშირად ადამიანები სექსუალური აქტის ამღწერ ტერმინებს იყენებენ. პატარაია საზოგადოებას ლექსიკის შეცვლას სთხოვს და დეტალურად ხსნის, თუ რა რატომ არ შეიძლება ასეთი ტერმინების გამოყენება.

"უკრაინის კონტექსტში წამდაუწუმ მხვდება სიტყვები "ფეხები გააშლევინა", "წაკუზა" და ათასი სხვა ასეთი გამოვლინება გაუპატიურების კულტურისა (rape culture). ამიტომ გადავწყვიტე, არ დავიზარო და უცნობ-ნაცნობებს მივუკომენტაარო: "გამარჯვება=გაუპატიურებას?!"

თუ ბევრნი შევეცდებით ხაზგასმას და მითითებას, ადამიანები თავადაც დაფიქრდებიან, იგრძნობენ უხერხულობას და ნელ-ნელა შეწყვეტენ ამ ფრაზების ტირაჟირებას. მე ჩემ ბაბლზე ვიღებ პასუხისმგებლობას, თქვენც თუ თქვენსაზე აიღებთ, მალე წესიერი ადამიანები საკუთარ ლექსიკას დაუკვირდებიან და აღარ გაუტოლებენ გამარჯვებას გაუპატიურებას. გთხოვთ, არ დაიზაროთ, დანერგეთ და გააზიარეთ.. ეს არ არის ვინმესთვის ზრდილობის სწავლება, ესაა გაუპატიურების კულტურასთან ბრძოლა! ენა ჩვენ აზროვნებას განაპირობებს! ენა მნიშვნელოვანია! #endrapeculture #ებრძოლეგაუპატიურებისკულტურა".

უფლებადამცველი კიდევ ერთ პოსტს აქვეყნებს, სადაც აღნიშნავს, რომ ადამიანებმა უნდა ისწავლო ერთმანეთის პატივისცემა:

"აქ წერია: ისწავლეთ იმ მაგიდის დატოვება, სადაც ზრდილობით არ გიმასპინძლდებიან. (ინგლისურად უკეთ ჟღერს). ოჯახებში ძალადობა იმიტომ ხდება, რომ პატივისცემა ავიწყდებათ. ავიწყდებათ კი არა, არც იციან ხშირად. ბავშვს რომ მშობელი ცემს და აგინებს, იმ ბავშვს პატივისცემა არ ეცოდინება, განსაკუთრებით ოჯახში. ქართულ ოჯახებში მოსულა ქალების და ბავშვების გინება და დამცირება, მერე ეს ჩაგვრა უკიდურეს ფორმებს იღებს.

გოგოებო, შეყვარებული პირველად რომ შეგაგინებთ, დაშორდით! დაქორწინებულო ქალებო: კარგად აუხსენით ქმარს, რა გწყინთ და რატომ გწყინთ; აუხსენით, რომ გინება და სხვა უხამსი მომართვა უპატივცემულობაა და ამას აღარ მოითმენთ. და მერე მართლა აღარ მოითმინოთ!

ბიჭებო: პატივი ეცით საყვარელ ქალებს, თუ პატივისცემა არ შეგიძლიათ, ე.ი. სიყვარული არ შეგიძლიათ. ეჭვიანობა სიყვარული არ არის! არ აგერიოთ კონტროლი/ფლობის სურვილიადამიანის და სიყვარული ერთმანეთში.

დაქორწინებულო კაცებო: მართეთ საკუთარი ლექსიკა და ისეთივე პატივისცემა გამოიჩინეთ ცოლ-შვილის მიმართ, რასაც დირექტორებთან და ქუჩის ავტორიტეტებთან იჩენთ. ოჯახის წევრების პატივისცემა ზედმეტი არასდროს არ არის.

არანაირი სიყვარული არ არსებობს პატივისცემის გარეშე! ოღონდ პატივისცემა მხოლოდ მაშინ მუშაობს, თუ ორმხრივია, ამიტომ ასწავლეთ ერთმანეთს ის, რაც საკუთარ ოჯახებში შესაძლოა არ უსწავლებიათ. შეიძლება მამათქვენი აგინებდა დედათქვენს და თქვენ გცემდნენ კიდეც მშობლები, მაგრამ რა გაეწყობ -, ვაპატიოთ მათ ძველი ცოდვები და არ დავემსგავსოთ ცუდში.

პატივისცემა არ არის სადღეგრძელოს თქმა და ავტობუსში ადგილის დათმობა, პატივისცემაა, როცა არ უყვირი, როცა არ სცემ, როცა არ გძულს. ან რატომ უნდა გვძულდეს ყველა? წაგვლეკა უკვე ამ სიძულვილმა. სულ ვიღაც გვძულს: ხან ნაცები, ხან ქოცები, ხან გეები, ხან სომხები, ხან მუსლიმები, ხან ბოშები, ხან შავკანიანები, ხან ჟურნალისტები, ხან ენჯეოშნიკები... სიძულვილით განვისაზღვრებით უკვე, "დაგმე მიშა" გვჭირს, არაა საჭირო ამდენი სიძულვილი... არც საკუთარი თავის სიძულვილია სიკეთის მომტანი. გიცდიათ, რომ სიყვარულით და არა სიძულვილით განგესაზღვრათ თქვენი თავი?"