ჩრდილოეთ გერმანიის ხელისუფლებამ 8000-ზე მეტ ადამიანს სთხოვა ხელახალი აცრა Covid-19– ის წინააღმდეგ. ისინი ეჭვობენ, რომ ბევრ აცრილს ექთნმა ვაქცინის ნაცვლად მარილიანი ხსნარი გაუკეთა.

პოლიცია იძიებს მედდის საქმეს ფრიზლანდის ვაქცინაციის ცენტრიდან, რომელიც ჩრდილოეთ ზღვის სანაპიროს სიახლოვეს მდებარეობს.

ფიზიოლოგიური ხსნარით "აცრილთა" უმეტესობა 70 წელს გადაცილებული ადამიანები იყვნენ - პანდემიის დროს, სწორედ ამ ასაკის ხალხია მაღალი რისკის ქვეშ.

"40 წლის ქალმა სოციალურ მედიაში გამოხატა სკეპტიციზმი კორონავირუსთან დაკავშირებით და გააკრიტიკა მთავრობის ის შეზღუდვები, რომლებიც მიზნად ისახავდა პანდემიის შეკავებას."-ციტირებს გამოცემა Süddeutsche Zeitung– ი ინსპექტორ პიტერ ბერის სიტყვებს.

რეგიონული მაუწყებლის, NDR- ის ცნობით, 8 557 ადამიანიდან ჯერჯერობით დაახლოებით 3600 უკვე შეთანხმდა ახალ ვაქცინაციაზე.სავარაუდოდ სწორედ ამდენ ადამიანს გაუკეთა მედდამ მარილწყალი.

აპრილში მედდამ აღიარა, რომ მან ექვს პაციენტს გაუკეთა მარილიანი ხსნარი, მიზეზად დაასახელა ის, რომ თითქოს ვაქცინის მთლიანი ფლაკონი იატაკზე დაუვარდა, გაუტყდა და არ სურდა ამის შესახებ ვინმეს გაეგო.

თუმცა, გამოძიების დროს დადგინდა, რომ გაცილებით მეტმა ადამიანმა მიიღო ფიზიოლოგიური ხსნარი Pfizer / BioNTech ვაქცინის ნაცვლად და ადგილი აქვს განზრახ საბოტაჟს.

პოლიცია აგრძელებს მოწმეების გამოკითხვას. არ გამორიცხავენ, ​​რომ მედდას შესაძლოა სხვებთან ერთად პოლიტიკური მოტივებიც ამოძრავებდა, თუმცა მისი ადვოკატები ამას უარყოფენ და ეჭვქვეშ აყენებენ ვაქცინების ჩანაცვლების რაოდენობასაც.

გერმანიაში ვაქცინაციის წინააღმდეგ რამდენიმე აქცია ჩატარდა, რომელთა მონაწილეებს შორის იყვნენ ულტრამემარჯვენე ჯგუფები, რომლებიც არ აღიარებენ ეპიდემიის მიმდინარეობისა და ვირუსის გავრცელების მასშტაბების ოფიციალურ მონაცემებს.