საქართველო მაპატიონ ინდოეთის პაგოდებმა, ეგვიპტის პირამიდებმა, იტალიის ბაზილიკებმა, ამერიკის ავტოსტრადებმა, პარიზის ბულვარებმა,... 2021, 12 მარტი, 15:09 ნეხვის ჭია თავს ამოყოფს ერთხელაც ნეხვიდან, დაინახავს გაშლილ ველებს, მწვანე ტყეს, ზღვას, მდინარეებს, და მამას ეკითხება:
- მამი, ნახე, რა მაგარი ბუნებაა და ჩვენ რატომ ვცხოვრობთ ნეხვში?
- ეეჰ, შვილო, არის ასეთი ცნება "სამშობლო".
დღეს "სამშობლო" მხოლოდ მთვრალების საყვარელი თემა გახდა. რატომ?
ალბათ იმიტომ, რომ როცა ცვრიან ბალახზე ფეხშიშველა სიარულით გაცივდები, სახელმწიფოს მიერ მოცემული დაზღვევა მკურნალობის ხარჯებს მაინც უნდა ფარავდეს.
ჰოდა, იმას ვამბობდი, რომ სიტყვა "სამშობლო" სულ უფრო გაიშვიათდა, ნელ-ნელა ჩაანაცვლა სიტყვებმა - "ჩემი ქვეყანა", " საქართველო".
და განა მარტო სიტყვა? სამშობლოს სიყვარულიც.
არ დამიწყოთ ახლა ბრტყელ-ბრტყელი სიტყვების ფრქვევა, რომელიც უკვე მხოლოდ ყურის სასმენ მილებს მივსებს და დაფის აპკსაც ვეღარ არხევს იმდენად უსუსურია.
სამშობლოს რეალური სიყვარულიც აღარ ვიცით, რა არის. რომ ვიცოდეთ, ცოტა სხვანაირად ვიცხოვრებდით, რადგან ეს ის გრძნობაა, რომელიც საკუთარ თავზე და კომფორტზე ხელს აგაღებინებს, საკუთარ ინტერესებს უკანა პლანზე გაგატყორცნინებს, სიცოცხლეზეც უარს გათქმევინებს, უკაცრიელ სოფელში რომ სოფლის უკანასკნელ მოჰიკანად დაგტოვებს, კარს არ გამოგახურინებს, კერას არ მიგატოვებინებს. ნაღდი სიყვარული ისაა, სამშობლოს ნებისმიერი ქალაქის ბედზე რომ გაზრუნებს და თუ რომელიმე კუთხე -კუნჭულის განვითარებისთვის აუცილებელია, იქაც რომ დაუწუწუნებლად გატარებს.
მარტო ქუთაისში კი არა, მარნეულში ან ახალქალაქში ჩადგმულ პარლამენტშიც რომ ივლი სამუშაოდ და არ დაიწუწუნებ, რომ დაგღალა გზამ და კომფორტი მოგეშალა. მაგრამ ჩვენ ჩვენი თავები უფრო გვიყვარს, ხელფასები უფრო გვიყვარს, ვიდრე სამშობლო და სულ არ გვაინტერესებს, რა ბედი ელის ამ სამშობლოს დაცლილ, გაუკაცრიელებულ სოფლებს, ოღონდ საკუთარი კომფირტის ზონიდან არ გავიდეთ.
ამასობაში, კომფორტის ზონა თვითონ გვტოვებს. დედაქალაქში სუნთქვა აღარ შეიძლება, ერთმანეთზე მიჯრილ კორპუსებს შორის ნემსის ჩასაკვეხებელი ადგილიც არ რჩება ფეხით რომ გაიარო, ტროტუარები ავტომანქანების სადგომ ადგილებად იქცა და გვერდი რომ აუარო, სავალ ნაწილზე მზად ხარ საბურავებში შეუვარდე ავტომანქანებს...
არადა, ქართველების დიდი ნაწილი უცხოეთშია ემიგრირებული. სამაგიეროდ, უამრავი სხვა ეროვნების ადამიანი მოილტვის საქართველოსკენ და ასრულებს მურვან ყრუს, თემურ ლენგის, მელიქ-შაჰის, შაჰ-აბასის ოცნებას... ტურისტებზე არ მაქვს საუბარი.... ადამიანებს ყოველთვის ამოძრავებდათ საკუთარი კუთხის, სამშობლოს მიწა-წყლის სიყვარული. მის დასაცავად სიცოცხლესაც არ იშურებდნენ. ცნობილია, რომ დიდი პოლონელი კომპოზიტორის, შოპენის ანდერძის თანახმად, პარიზიდან მისი გული ვარშავაში გადაასვენეს.
სამშობლოს სიყვარულმა დიდი და პატარა ქვეყნები არ იცის. სამშობლოს სიყვარულის განზოგადებული მაგალითი მოჰყავს გამოჩენილ დაღესტნელ პოეტს, რასულ გამზათოვს, თავის შესანიშნავ წიგნში «ჩემი დაღესტანი»:
«დე, მაპატიონ ინდოეთის პაგოდებმა, ეგვიპტის პირამიდებმა და იტალიის ბაზილიკებმა, მაპატიონ ამერიკის ავტოსტრადებმა, პარიზის ბულვარებმა, ინგლისის პარკებმა და შვეიცარიის მთებმა, მაპატიონ პოლონელმა, იაპონელმა და რომაელმა ქალებმა _ თუმცა, ვტკბებოდი თქვენით, გული მაინც მშვიდად ცემდა; ხანდახან ოდნავ თუ ამიჩქროლდებოდა, ისე კი არა, რომ ყელი გამშრომოდა და თავბრუ დამხვეოდა.
ახლა კი, კლდეების ფერხთით შეყუჟული სამოცდაათი ქოხი დავლანდე, რატომ შემიქანდა გული ისე ძალუმად, რომ ნეკნებში გამიარა მწველმა ტკივილმა, თვალთ დამიბნელდა, თავბრუ დამეხვა, თითქოს მთვრალი ვიყო ან ავადმყოფი?
ნუთუ დაღესტნის პატარა აული ვენეციაზე, ქაიროსა და კალკუტაზე უფრო მშვენიერია? ნუთუ ბილიკზე მიმავალი ზურგზე ფიჩხმოკიდებული ხუნძი ქალი უფრო მშვენიერია, ვიდრე მაღალ-მაღალი, ოქროსფერთმიანი სკანდინავიელი?
ცადა, დავეხეტები შენს მინდვრებში და დილის ცივი ცვარი მისუსხავს დამაშვრალ ფეხებს. მთის ნაკადულები რაა, წყაროს წყალს ვისხურებ პირზე… შენ წყარო ხარ, ცადა, მუხლებზე გიჩოქებ და მხურვალე ბაგეებით გეწაფები».
აი, ეს არის ის, რასაც ადგილის დედის, შენი სამშობლოსა და ერის სიყვარული ჰქვია და, თუ კაცი, როგორც ვაჟა-ფშაველა იტყოდა, ან ჭკუანაკლები არ არის, ან რომელიმე პარტიის პროგრამით ხელფეხშებორკილი, არ შეიძლება, ამ სიყვარულს რაიმე შეუტოლოს, იგი უსაზღვრო და უნაპიროა.
149 4-ს მოსწონს
|