მეუფე დანიელი- ეს არის უკვე ანტიქრისტეს მოსვლის წინა პერიოდი

რელიგია

2020, 26 ივლისი, 14:27

"რჩეული ქრისტიანული ერები და ქვეყნებიც კი ცდუნდებიან. აი, ეს არის უკვე სწორედ ანტიქრისტეს მოსვლის წინა პერიოდი და ჩვენ ბოლო საუკუნეებში ვხედავთ, რომ რჩეული ქრისტიანული ერები თანდათან კარგავენ სარწმუნოებას და მათში სულ უფრო და უფრო მატულობს ღვთის სარწმუნოების მოწინააღმდეგე მდევნელი ძალები."- განაცხადა ჭიათურისა და საჩხერის მიტროპოლიტმა, მეუფე დანიელმა სამების საკათედრო ტაძარში ქადაგებისას, მან აგრეთვე ისაუბრა წმინდა ილია მართალზე(ილია ჭავჭავაძეზე), რომელსაც განსაკუთრებული როლი ჰქონდა მე-19 საუკუნეში ანტიეროვნული და ანტიქრისტიანულ ფასეულობებთან ბრძოლაში და ისიც შემთხვევითი არ არის, რომ მე-20 საუკუნეში მოგვევლინა პატრიარქი, ასევე ილიას სახელით.

"როგორც ელია თეზბიტელი იქნება ბოლო ჟამს მქადაგებელი ჭეშმარიტი სარწმუნოებისა და დამცველი ჭეშმარიტი სარწმუნოებისა, ასევე ის ქვეყანა, რომელსაც მიენიჭა მისი სიწმინდე მოწოდებულია, რომ იყოს ჭეშმარიტი დამცველი მართლმადიდებლობისა და სწორედ ამისთვის ამზადებს უფალი ამ ქვეყანას. ამიტომ დაუდგინა მფარველად ღვითისმშობელი და არ არის შემთხვევითი, რომ თანდათან ჩვენ ვხედავთ სწორედ ამ ჟამის მოახლოებას, მრავალი ნიშანია და მთავარი ნიშანი, როგორც უფალი სახარებაში ბრძანებს, არის გამრავლება ცრუ მოძღვრებათა და ცრუ წინასწარმეტყველებათა იმ სახით, ისეთი მასშტაბით, როცა თვით რჩეულნიც, რჩეული ქრისტიანული ერები და ქვეყნებიც კი ცდუნდებიან. აი, ეს არის უკვე სწორედ ანტიქრისტეს მოსვლის წინა პერიოდი და ჩვენ ბოლო საუკუნეებში ვხედავთ, რომ რჩეული ქრისტიანული ერები თანდათან კარგავენ სარწმუნოებას და მათში სულ უფრო და უფრო მატულობს ღვთის სარწმუნოების მოწინააღმდეგე მდევნელი ძალები.

მე-19 საუკუნეში, როცა საქართველოში შემოდიოდა უკვე სული უწრმუნოებისა, სული ღვთის ბრძოლისა, ეროვნული ფასეულობების უარყოფისა, სწორედ მაშინ ღმერთმა მოუვლინა საქართველოს წმინდა ილია მართალი, ილია ჭავჭავაძე, რომელიც აღიმართა ვითარცა სალი კლდე ამ ბოროტი მანქანების წინააღმდეგ და არ არის შემთხვევითი, რომ მას ერქვა ილია, რადგან სწორედ თეზბიტელის შემართებით მხნედ ებრძოდა იგი ყოველგვარ ანტიეროვნულ, ანტიქრისტიანულ ფასეულობებს. მის გვერდში იბრძოდა აკაკი წერეთელი და დასი მთელი ჩვენი ღირსეული მამულიშვილებისა. არ არის გასაკვირი, როცა მე-20 საუკუნის დასასრულს ჩვენ მოგვივლინა ეკლესიის წინამძღოლად უფალმა პატრიარქი, რომლის სახელი არის ილია, თეზბიტელის სახელი. ისიც ასევე კიდევ უფრო გაძლიერებულ ბრძოლას სარწმუნოებასთან, სულიერ ფასეულობებთან დაუპირისპირდა და უპირისპირდება თავისი სიკეთით, არა აგრესიით, სიყვარულის, სიწმინდის მაგალითებით და ბოროტი ძალა ცდილობს, რომ როგორმე ჩრდილი მიაყენონ ამ ღვაწლს, ისევე როგორც ცდილობდნენ ილიასთვის ჩრდილი მიეყენებინათ და ეს არის ცნობილი ბოროტი ძალის იარაღი სიკეთის მიმართ ცილისწამება.

აბსურდია ის ცილისწამებები, რომელიც იყო ილია მართალის წინააღმდეგ, ჩვენი დიდი პატრიარქის წინააღმდეგ, რადგან მისმა საქმეებმა ჩვენი ერი გამოიყვანა იმ სულიერი უძლურებიდან, რომელშიც იყო ჩვენი ქვეყანა მე-19 და განსაკუთრებით მე-20 საუკუნეში და რომ ჩვენი ერი ფეხზე დადგა.

ამის ნიშანი იყო წლევანდელი წელი, როცა მთელს მსოფლიოში შეწყდა რელიგიური მსახურება და მართლმადიდებელ ეკლესიებში აიკრძალა მრევლის მისვლა, აღდგომას მხოლოდ საქართველოში იყო ისეთი მრევლი, რომელიც არ შეუშინდა განსაცდელს და იდგა და ადიდებდა უფალს აღდგომას. ეს არის გამარჯვება, ეს არის პატრიარქის ღვაწლის ნაყოფი“, - განაცხადა მეუფე დანიელმა.

4-ს მოსწონს