მაგრამ ეს არის ჩვენი ბრალი: ჩვენ არ ვართ საკმარისად პრინციპულები ირანთან, რუსეთთან და ჩინეთთან მიმართებით. ჩვენ დაინტერესებულები ვართ აღნიშნულ ქვეყნებთან მჭიდრო ეკონომიკური და სოციალური კავშირების გაბმით, რაც ეშმაკთან გარიგებას ჰგავს. არადა, ჩვენ არ უნდა ვაჭაჭანებდეთ რუსებს, ჩინელებს და ირანელებს საქართველოში, იტალიასა და ევროპის სხვა ქვეყნებში. არ უნდა გაგვქონდეს ღვინო არადემოკრატიულ ქვეყნებში და საერთოდ უნდა ამოვშალოთ ეგ სივრცე ყოველგვარი შესაძლო კავშირების სიიდან. რადგან არადემოკრატიული ქვეყნები ყოველმხრივ ძალიან საშიში და ტოქსიკური ქვეყნებია ტოტალიტარული წყობის და თავისუფალი პრესის არარსებობის გამო, რაც კორონავირუსმა აშკარად დაგვანახა.

ამიტომ კარგი იქნება, თუ ძალიან მკაცრ სავიზო შეზღუდვებს შემოვიღებთ არადემოკრატიულ ქვეყნებთან. შეზღუდვები უნდა დავაწესოთ არა რასობრივი ან ეკონომიკური ნიშნით, არამედ ქვეყნის დემოკრატიულობის ხარისხის მიხედვით. რადგან ჩვენ არ ვიცით, რა სასიცოცხლო საფრთხეებს გვიქადის ტურისტი, რომელიც ტოტალიტარული ქვეყნებიდან შემოდის. იქნებ, რადიაციული გაჟონვა მოხდა და ტანსაცმელი ატომური ნაწილაკებით აქვს სავსე? ვინ მოგვაწვდის ამის შესახებ ჩვენ სათანადო ინფორმაციას იქიდან, სადაც თავისუფალი პრესა არ არსებობს? შემოვიდნენ ბოტსვანადან ტურისტები, მაგრამ ნუ შემოვლენ ზიმბაბვედან. იაპონელები და ტაივანელები შემოვიდნენ, მაგრამ ჩინელები და ირანელები ნუ შემოვლენ. კანის ფერს და თვალის ჭრილს მნიშვნელობა არ უნდა ჰქონდეს, მაგრამ ქვეყანა, სადაც თავისუფალი პრესა არ არსებობს, უაღრესად საშიშია.

დღეს მთელი უბედურება რუსეთის, ჩინეთის და ირანის გამო გვჭირს და ჩვენ მაინც ვეფერებით მაგ საშინელ ქვეყნებს და ვიღებთ მათ მოქალაქეებს, რომლებიც, არავინ არ იცის, ვინ არიან და რა საფრთხეს გვიქადიან. ეს დაუყოვნებლივ უნდა დასრულდეს.