რეკლამისა და მომხმარებლის ფსიქოლოგიის დარგში, სხვადასხვა კვლევაზე დაფუძნებით, არაერთი მეთოდია ცნობილი, რომლის მეშვეობითაც შესაძლოა მომხმარებელზე ზემოქმედების მოხდენა.

„ფეხი კარში“ - მეთოდი, როდესაც ადამიანს ჯერ მცირე რაიმეს შესრულებას სთხოვენ და შემდეგ უფრო დიდი თხოვნით მიმართავენ. ეს აიხსნება იმით, რომ ადამიანი ეთანხმება და შინაგანად ამართლებს ხოლმე თავის საქციელს. თუ რაიმე მანამდე მისთვის მიუღებელი იყო, თუ გარკვეული მიზეზების გამო დაეთანხმა, თვითონ ეს ქცევა შემდეგ მისთვის ხდება მისაღები. მაგ. მაცხოვრებლებს პლაკატის გაკვრა სთხოვეს თავისი ეზოების კარებზე მძღოლების გამარფთხილებელი წარწერით, რაზედაც უარი მიიღეს. მეორე ნაწილს ჯერ თხოვეს პატარა განცხადება დაეკიდათ ფანჯარასთან, რასაც დიდი ნაწილი დათანხმდა და შემდეგ ისევ იმ პლაკატის გაკვრა სთხოვეს. ამჯერად 4-ჯერ მეტი ადამიანი დაითანხმეს.

„ნაკლები ბოროტება“ - ეს მეთოდი პირიქითაა, როდესაც ადამიანს ჯერ დიდი თხოვნით მიმართავენ და თუ უარს ეუბნება, შემდეგ უფრო მცირეთი. ამის მექანიზმი აღქმის კონტრასტულობაა, როდესაც მეორე თხოვნა ბევრად უმნიშვნელო ჩანს. მეორე მიზეზი არის ერთმანეთისათვის ანგარიშის გაწევა, თუ ადამიანი მოდის დათმობაზე, ჩვენც ვეცდებით წავიდეთ მასთან დათმობაზე. ამ მეთოდის გამოყენების ნათელი მაგალითია, როდესაც გამყიდველი ჯერ ძვირიან პროდუქტს გთავაზობთ და შემდეგ ნაკლები ღირებულების.

ურთიერთვალდებულების პრინციპი - ესა არის მეთოდი, როდესაც მცირე საჩუქრის შემდეგ, მომხმარებელს უჩნდება ვალდებულების განცდა, რომ იყიდოს პროდუქტი. ამას ემსახურება დეგუსტაციები, ნიმუშების ჩუქება და ა.შ.

ასევე, ეფექტური მეთოდია მომხმარებელთა შექება, კომპლიმენტი. მაგ. თუ საქველმოქმედო ორგანიზაციის თანამშრომელი მოგმართავთ კომპლიმენტით: „თქვენ კეთილი ადამიანი ხართ“, ეს გავალდებულებთ გაიღოთ მოწყალება და დაასაბუთოთ, რომ ხართ კეთილი. ანუ სიკეთითვე გადაუხადოთ. მაგ.: თუ საბავშვო ენციკლოპედიის დახლზე წარწერაა „მზრუნველი მშობლებისათვის“, ეს უბიძგებს მშობელს შეიძინოს ეს წიგნი შვილისათვის.

მომხმარებელთა სტიმულირება გულისხმობს საქონლის გასაღების მრავალ მეთოდს, როგორიცაა ფასდაკლებები, პრემიები, კონკურსები, ტოტალიზატორები, ლატარეები, კუპონები, გათამაშებები და ა.შ. ფაქტობრივად, ზოგიერთი კომპანიისათვის ეს მეთოდები წარმატების ყველაზე მნიშვნელოვან შემადგენელ ნაწილად ითვლება. მაგალითად, ერთ-ერთი ამერიკული ჟურნალი მილიონობით ადამიანს უგზავნის ფოსტით ბლანკებს, რათა გახდნენ ჟურნალის გამომწერები. ამ ბლანკის შემვსები მონაწილეობს ლატარეაში, სადაც შეუძლია მოიგოს მილიონი. რომ არა ეს გათამაშება, ადამიანთა დიდი ნაწილი არც გახსნიდა ფოსტას. ანალოგიურია ბანკის გათამაშებები (მაგ.: ანაბარის გახსნა).

როგორ ვაიძულოთ მომხმარებელი პროდუქტი შეიძინოს განმეორებით?

ზოგიერთი კომპანია მიმართავს დაგროვებითი ქულების ტექნიკას. მაგ.: მომხმარებელმა უნდა შეიძინოს გარკვეული ღირებულების პროდუქტი, რათა მისმა ბილეთმა მიიღოს მონაწილეობა გათამაშებაში. მომხმარებელს რომ ჰქონდეს სურვილი მეორე, მესამე და მეტი პროდუქტი იყიდოს, კომპანია აძლევს თითო ზღვრულ ღირებულებაზე (მაგ. ყოველ 25 ლარზე) ერთ ბილეთს, რაც მოგების ალბათობას ზრდის. ცნობილია გათამაშებების მოახლოებისას მომხმარებელთა მიერ ნასყიდობის გამსხვილების ტენდენცია (ჩეკის ღირებულების ზრდა) საცალო ვაჭრობის კომპანიებში. განსხვავებული მეთოდია, როდესაც თითო ნასყიდობის შემდეგ მომხმარებელი იღებს ე.წ. ბილეთს მეორე ნასყიდობაზე ფასდაკლების მისაღებად. ამ მეთოდის მიზანია, მეორედაც იგივე კომპანიაში შეაძენინოს მომხმარებელს საქონელი.

კოკა-კოლამ მიმართა ორიგინალურ მეთოდს, რათა მომხმარებელი ნელ-ნელა შეეჩვია პროდუქტის ყიდვისათვის. ახალი პროდუქტის გამოშვებისას მომხმარებელს ჩუქნიდა, როგორც პროდუქტის ერთ ქილას, ასევე ფასდაკლების რამდენიმე კუპონს. კუპონები განსხვავდებოდა ერთმანეთისაგან ფასდაკლების ოდენობით და ასევე გამოყენების ვადით. ყველაზე დიდი ფასდაკლების კუპონს ჰქონდა ყველაზე მცირე ვადა, ყველაზე მცირე ფასდაკლების კუპონს ყველაზე დიდი ვადა. ასე ნელ-ნელა აჩვევდა მომხმარებელს პროდუქტს რეალურ ფასს.