უახლოეს ხანში რაიონში ბევრი რამ გაკეთდა მოსახლეობის საყოფაცხოვრებო და სავაჭრო მომსახურების გაუმჯობესებისთვის. სათანადო კადრებთან ერთად დიდ როლს ასრულებს მატერიალურ-ტექნიკური ბაზაც. ახალი ტიპის მაღაზიები, თუ სავაჭრო ცენტრები. ორი წლის წინ წითელწყაროს ცენტრში გაიხსნა რაიკოოპერატივის ორსართულიანი მაღაზია, ე.წ. „სავაჭრო ცენტრი“, სადაც მშრომელებს შეუძლიათ შეიძინონ როგორც სასურსათო, ისე სამრეწველო პროდუქცია. ცენტრმა კიდევ უფრო დაამშვენა ქალაქი.

სოფელ არხილოსკალოში მცხოვრებმა ივანე გიორგის ძე ბუბუნაურმა და ნიკოლოზ ალექსის ძე ბურდულმა მოილაპარაკეს, ღამე შეხვედროდნენ ერთმანეთს და ქვემო ქედში ხვთისო ხორნაულის ბოსლიდან მოეპარათ დეკეული. გამოიყვანეს თოკშებმული დეკეული, წაიყვანეს ბურდულის ეზოში, დაკლეს და ხორცი ორ ნაწილად გაიყვეს. მეორე დღეს გაიგეს, რომ მილიციის მუშაკები ბინებში ჩხრეკას ატარებდნენ. შეშინებულმა ნადავლი შეფუთვის გარეშე ორმოში ჩაფლა. ორმოდან მილიციამ ხორცი ამოიღო, ბურდული და ბუბუნაური კი მიეცნენ სისხლის სამართლებრივ პასუხისგებაში. სახალხო სასამართლომ, გიორგი გონაშვილის თავმჯდომარეობით, განიხილა სისხლის სამართლის საქმე და საქონლის ქურდებს ორ-ორი წლით თავისუფლების აღკვეთა მიუსაჯა.

შეურიგებელი ბრძოლა - ნეგატიურ მოვლენებს! წითელწყაროში რეიდი ჩატარდა, რაშიც რედაქციის კორესპონდენტები, ფინგანის რევიზორი, ფინგანის ინსპექტორი, შსს რაიგანყოფილების უფროსი ოპერმუშაკი და კომისიის სხვა წევრები მონაწილეობდნენ. ვის აძლევს ხელს მაგარი სასმელების საზკვების შტამპის გარეშე გაყიდვა? რატომ ატყუებენ მომხმარებელს ზომა-წონაში? გაუგებარია, სამზარეულოში მზარეულები არიან, თუ დამლაგებლები. დახლებში კი კვლავაც სპეცხალათის გარეშე დგანან. მაღაზიებში არ აქვთ სავალდებულო ასორტიმენტის საქონელი. მრავალი რეიდის მიუხედავად, ისევ და ისევ ანტისანიტარიაა ვაჭრობის ობიექტებში. ვის აწყობს მუშაობა უქვითროდ?

წითელწყაროს რაიკოოპკავშირმა ამ დღეებში გახსნა ლიმონადის ახალი ქარხანა. ქარხანა დღეში 1000-1500 ბოთლ მაღალხარისხოვან ლიმონადს უშვებს, ხოლო ზაფხულში ჩამოასხავს 3000 ბოთლამდის.

შირაქის მტს-ის მექანიზატორებმა საწარმოო გეგმა გადაჭარბებით შეასრულეს. მაგრამ სამართლიან უკმქყოფილებას გამოსთქვამენ, რომ მათთან მოისუსტებს კულტურულ-საგანმანათლებლო მუშაობა. არ უჩვენებენ კინოსურათებს, არ ტარდება ლექცია მოხსენებები.საჭიროა პარტიის რაიკომის პროპაგანდისა და აგიტაციის ფა კულტურის განყოფილებამ აღნიშნული მდგომარეობიდან სათანადო დასკვნები გააკეთოს და ამ საქმეს დროულად გამოეხმაურონ.

გაზეთი „შირაქი“ 1978 წლის თებერვალი.