მწუხარებას, სახელმწიფო უსაფრთხოების სამსახურის სპეციალური ღონისძიებების მთავარი სამმართველოს მებრძოლის გარდაცვალების გამო, ამსუბუქებს სიამაყის გრძნობა. თანავუგრძნობ გარდაცვლილის ოჯახს, მის ორ შვილს, მეუღლეს! მათ ახლობელი ადამიანი გამოეცალათ, საქართველომ კი – კიდევ ერთი გმირული სულის ვაჟკაცი და პროფესიონალი დაკარგა. ეს ოჯახისთვის, ისევე, როგორც ერისთვის, დიდი დანაკლისია.

22 ნოემბერს გაბრიელ სალოსის გამზირზე ჩატარებული სპეცოპერაციის შემდეგ, რომლის დროსაც განეიტრალებულ იქნა შეიარაღებული დაჯგუფება, რომელიც 20–21საათის განმავლობაში ცეცხლს უხსნიდა სპეცრაზმს, გაჩნდა უამრავი შეკითხვა. კერძოდ, რა მიზნით ჩამოვიდნენ ტერორისტები საქართველოში, სად, როგორ და რისთვის შეიძინეს იარაღი, როგორ შემოიტანეს, ან რას გეგმავდნენ ამ რაოდენობის შეიარაღებით? ექსპერტი კავკასიურ საკითხებში, ბ–ნი მამუკა არეშიძე ვერსიების დონეზე არ გამორიცხავს, რომ შესაძლოა, მათ ტერაქტის მოწყობა ჰქონდათ გამიზნული თბილისში დაგეგმილ რომელიმე ღონისძიებაზე, მაგალითად აბრეშუმის გზის ფორუმზე, რომელიც 28 ნოემბერს სასტუმრო „ბალტმორ“–ში გაიმართება, სადაც რამდენიმე ქვეყნის პრემიერი მიიღებს მონაწილეობას, ან სულაც საბავშვო ევროვიზიაზე, რომელიც ასევე თბილისში ტარდება, სადაც ევროპიდან არაერთი მცირეწლოვანი კონკურსანტი ჩამოვა მონაწილეობის მისაღებად.

ცნობილია, რომ ტერორიზმი დღევანდელი ცივილიზებული მსოფლიოს ერთ–ერთი ყველაზე მწვავე გამოწვევაა, რომელსაც ბევრი ძლიერი ეკონომიკის და განვითარებული ინფრასტრუქტურის მქონე სახელმწიფო ვერ უმკლავდება სათანადოდ. ამჯერად ჩვენმა სახელმწიფო სამსახურებმა ღირსეულად იმუშავეს, მათი თავდადება მხოლოდ აღფრთოვანებას და მადლიერებას იმსახურებს. მართალია, სპეცოპერაციას, რომელიც 20 საათზე მეტხანს გრძელდებოდა, მსხვერპლი მოჰყვა, მაგრამ თავიდან იქნა აცილებული უფრო მასშტაბური საშიშროება.

დღეს ჩვენ დავრწმუნდით საქართველოს დაზვერვის სამსახურის მაღალპროფესიონალიზმში. სუს-მა, შინაგან საქმეთა სამინისტროს განსაკუთრებულ დავალებათა დეპარტამენტის, ქალაქ თბილისის პოლიციის დეპარტამენტისა და საპატრულო პოლიციის დეპარტამენტის თანამშრომლებმა, ასევე, საგანგებო სიტუაციების მართვის სააგენტოს მეხანძრე-მაშველებმა, აჩვენეს, რომ ისინი მზად არიან დაიცვან მოქალაქეების და ქვეყნის უსაფრთხოება. მათ დიდი საშიშროება აგვარიდეს, რის გამოც ნამდვილად გვაქვს მიზეზი, რომ ვიამაყოთ. ჩვენ დღეს დავინახეთ, რომ ჩვენი სახელმწიფო ინსტიტუტები მოწოდების სიმაღლეზეა, უსაფრთხოების სისტემები სათანადოდ არის აღჭურვილი და დაკომპლექტებული თავდადებული პროფესიონალებით, რომლებიც ძალისხმევას არ იშურებენ იმისთვის, რომ თავი დაცულად ვიგრძნოთ. ეს სამწუხარო ინციდენტი გახდა იმედის მომცემი ვივარაუდოთ, რომ სახელმწიფოს უსაფრთხოება უზრუნველყოფილია.

კიდევ ერთხელ გამოვთქვამ მწუხარებას და თანავუგრძნობ გმირულად დაღუპული სპეცრაზმელის – ვანო გოლოშვილის ოჯახს. უფალმა დაუმკვიდროს სასუფეველი, სადაც მართალნი განისვენებენ!

დღეს გიორგობაა, რომელსაც წელს მადლიერების დღე დაემთხვა. წმინდა გიორგი ფარავდეს საქართველოს და ყველა მის ერთგულ მებრძოლს, მეგობარს თუ გულშემატკივარს! გულწრფელი მადლობა მათ ამ ერთგულებისთვის, თავდადებისთვის და ჩვენი უსაფრთხოებისთვის, რომელზეც ზრუნავენ!