ცივი კერძების გაფორმების მარტივი იდეები, რომლითაც სადილს დღესასწაულად აქცევთ

ცივი კერძები

2017, 30 ოქტომბერი, 10:59

დღესასწაულისთვის საკვების მომზადება წარმატების მხოლოდ ნახევარია. როგორც იტყვიან "თვალი ჭამს და თვალის სვამსო" - ამიტომ გემოზე არანაკლებ მნიშვნელოვანია ვიზუალური მხარე. ამ მხრივ განსაკუთრებული ყურადღება უნდა მიექცეს ე.წ. ცივ კერძებს და სალათებს, რომელთა მომზადება გაცილებით ნაკლებ დროს მოითხოვს და გაფორმებასაც მეტად ემორჩილება.

ჩვეულებრივი პიცა იქნება თუ დაჭრილი ძეხვეული - ყველაფრის ნამდვილ შედევრად ქცევა შეიძლება. საჭიროა მხოლოდ ნებისყოფა და რამდენიმე ძალიან იაფი საშუალება: ჩხირები, ცომის დასაჭრელი ფორმები და აშ. იდეალური ფონის შექმნისთვის კარგი იქნება ახალი მწვანილი, ბოსტნეული, სანელებლები, სოუსები.

სადღესასწაულო ცივი კერძების გაფორმება მთელი ხელოვნებაა, თუმცა ნებისმიერს ხელეწიფება. ქვემოთ მხოლოდ რამდენიმე საინტერესო იდეას შემოგთავაზებთ, რომლებიც არც თუ ისე ძნელი განსახორციელებელი იქნება, სამაგიეროდ წარმატება და სტუმრების გაოცება გარანტირებული გექნებათ.

იდეები ცივი კერძების გაფორმებისთვის

პიცა ჩხირებზე - ეს უცნაური იდეა ნამდვლად სიურპრიზი იქნება თქვენი სტუმრებისთვის.

დაჭრილი ხორცეულის ასორტი ნებისმიერ, მათ შორის სამეფ სუფრასაც კი დაამშვენებს. მოსართავად კი იდეალური იქნება მწვანილის, ზეთისხილის და სხვადასხვაგვარი სოუსის გამოყენება.

ჩხირებზე აცმული საკვებით სტუმრების მოხიბვლა განსაკუთრებით ადვილია. მთავარია ცოტა მონდომება და ფანტაზია.

მინი-ბუტერბროდების სახით გაფორმებული ცივი კერძები ყოველთვის აქტუალურია. შეგიძლიათ გამოიყენოთ ჭვავის ან ღერღილის პური, მარილიანი კრეკერები და ა.შ.

ბოლო დროს განსაკუთრებით პოპულარული გახდა ლავაშისგან დამზადებული რულეტები, რომელშიც უამრავი რამის შეხვევა შეიძლება. უფრო დიდი ეფექტისთვის, ლავაშის მაგივრად სხვადასხვა ფერის ბლინების გამოყენებაც არ არის ურიგო. ფერებს კი უბრალოდ სტაფილოს, ისპანახის ან ჭარხლის წვენის დამატებით მიიღებთ.

ლუდზე მისაყოლებლები ერთ დიდ ლანგარზე შეგიძლიათ დააწყოთ - ასე უფრო ეფექტური იქნება.

ძალიან ორიგინალურად გამოიყურება მცირე ზომის ჭიქებში ულუფობით ჩაწყობილი ბოსტნეული ცხარე სოუსთან ერთად.

განსაკუთრებული ყურადღების ღირსია ხილის ასორტი, რომელიც ბავშვებსაც ძალიან მოეწონებათ.

დაჭრილი ბოსტნეული განსაკუთრებით მომხიბვლელი იქნება ლანგარზე თანაბრად დაწყობილი.

ამგვარი სილამაზის მომზადების მთავარი წესი არის წინასწარ გათვლა - შეგიძლიათ დახატოთ კიდეც, რისი გაკეთება გსურთ. შეგიძლიათ გამოიყენოთ სრულიად ჩვეულებრივი, უბრალო ინგრედიენტები, შედეგი კი შეუდარებელი გექნებათ.