ჩვენს პლანეტაზე უამრავი მცენარეა, რომელიც ადამიანების უმრავლესობას მხოლოდ სურათზე აქვს ნანახი და ზოგი სურათზეც არ უნახავთ. ის კი არა და, თურმე, დღემდე არის მცენარეები, რომლებიც ჯერაც არ აღმოუჩენიათ... ამის მტკიცებულებად ნეპენტეს ატენბოროც საკმარისია, რომელიც ამ საუკუნის დასაწყისში აღმოაჩინეს. აქ მოცემულია ყვავილების ფოტოები, რომლებიც შესაძლებელია არ გინახიათ:

ნაირფეროვანი მჟაველა (Oxalis tetraphylla)

ეს ულამაზესი ყვავილი, თავისი საზეიმო გარეგნობის გამო, საახალწლო შაქარყინული მოგაგონებთ.

ეს უჩვეულო ყვავილი მხოლოდ კაშკაშა სინათლეზე იშლება და როგორც კი შებინდდება, ქოლგასავით, სპირალისებურად იკეცება. ნაირფეროვანი მჟაველა მშვენივრად იტანს სახლის პირობებს და განსაკუთრებული მოვლაც არ ესაჭიროვება.

ფურისულა «Zebra Blue»

ფურისულასებრთა ოჯახში 500-მდე მცენარე არის, მაგრამ მათ შორის, ყველაზე ლამაზი სწორედ «Zebra Blue» არის. მას საკმაოდ უცნაური შეფერილობის, დიდი ზომის (დიამეტრი – 5-6 სმ.) ყვავილები აქვს: ყვითელი გულით და კრემისფერ ფონზე იისფერი ზოლებით.

აკვილეგია იგივე წყალიკრეფია (Aquilеgia)

ეს ულამაზესი ყვავილები მრავალწლოვანი ბალახოვანი მცენარეებია, ბაიასებრთა ოჯახიდან. მათი ბუნებრივი გავრცელების არეალს სკანდინავია, სამხრეთ და შუა ევროპის ტყეები და მინდვრები წარმოადგენს.
ყვავილის გვირგვინის დიამეტრი 4-5 სმ. არის. შეიძლება იყოს – იისფერი, ლურჯი, ვარდისფერი, წითელი და იშვიათად, თეთრი ფერის.

ნეპენტეს ატენბორო (Nepenthes Attenboroughii)

ეს უჩვეულო ყვავილი კუნძულ პალავანზე (ფილიპინები), 2000 წ. აღმოაჩინეს. მის აღმოსაჩენად 3 მეცნიერმა ს. მაკფერსონმა, ელ. რობინსონმა და ფილიპინელმა მეცნიერმა ფ. ჰაინრიხმა ექსპედიცია მოაწყეს და კუნძულზე მდებარე მთა ვიქტორია დალაშქრეს, რომელზეც მათ ამ ყვავილის დიდი “დოქები" აღმოაჩინეს.

როგორც გაირკვა, ეს უჩვეულო ყვავილი – ნამდვილი მტაცებელი არის და ის მღრღნელებით “იკვებება".

ცვრიანა (Drosera)

ცვრიანაც მტაცებელია. მაგრამ, წინა მცენარისგან განსხვავებით, ის მწერებზე “ნადირობს". მისი ყვავილედები ლორწოს გამოყოფენ, რომელიც მწერებისთვის ხაფანგს წარმოადგენს.
მცენარე მთებში იზრდება, შეუძლია ნებისმიერ ნიადაგზე გაიხაროს, როგორც ქვიშაქვებზე, ისე მაღალი ტენიანობის, ჭაობ-ტორფოვან ნიადაგზე.