2016 წელი ანჯელინა ჯოლისთვის მარტივი არ იყო. ბრედ პიტთან განქორწინების შემდეგ, მსახიობმა პირველი ინტერვიუ ჟურნალ Vanity Fair-ს მისცა, რომელშიც ისაუბრა თუ როგორ ცდილობენ ის და მისი 6 შვილი, მომხდარის შემდეგ, ცხოვრების აწყობას. გარდა ამისა, მსახიობმა აღიარა, რომ სულ ცოტა ხნის წინ შეძლო ჯანმრთელობის ყველა პრობლემის მოგვარება და ძველი ცხოვრების რიტმის დაბრუნება.

გაყრის შესახებ ინფორმაციის გავრცელების შემდეგ, მსახიობმა და მისმა შვილებმა, ფაქტიურად, 9 თვე «ჩემოდნებზე» გაატარეს. რადგან პაპარაცების დევნის გამო, იძულებულები იყვნენ, საცხოვრებელი ადგილი ხშირას შეეცვალათ.

ანჯელინამ გაყრის კონკრეტული მიზეზი არ დაასახელა. მაგრამ აღნიშნა, რომ ოჯახური ცხოვრების ბოლო თვეები, არც თუ ისე, კარგი იყო:


«მე არ მინდა ვიხმარო სიტყვა ცუდი… ყველაფერი უფრო მეტად რთული იყო, ვიდრე წინა წლებში».

«ეს ძალიან რთული პერიოდი იყო ჩვენი ოჯახისთვის, და ჩვენ ვაკეთებდით ყველაფერს, რაც შეგვეძლო, რომ დროის ეს მონაკვეთი, რაც შეიძლება უმტკივნეულო ყოფილიყო ჩვენი შვილებისთვის».

ჯოლიმ ასევე აღნიშნა, რომ მისმა შვილებმა დიდი სითამამე გამოიჩინეს შექმნილ სიტუაციაში და ყველაზე რთულ დროს, მისი საყრდენები იყვნენ.

სამწუხაროდ, გასულ წელს, პიტთან განქორწინება ერთადერთი პრობლემა არ ყოფილა, რომლის პირისპირაც ანჯელინა ჯოლი აღმოჩნდა. ჰიპერტონიის ფონზე, მუდმივი სტრესის და ნერვიულობის გამო, მას ბელის დამბლა (მიმიკური კუნთების დამბლა) დაემართა.

მსახიობი დაავადებას აკუპუნქტურით (ჩხვლეტა ნემსებით) გაუმკლავდა: «ამჟამად, ჯანმრთელობი მხრივ, ყველაფერი კარგადა მაქვს. თავს ნამდვილ ქალად ვგრძნობ: ბრძნულ გადაწყვეტილებებს ვღებულობ და ოჯახს და საკუთარ ჯანმრთელობას პირველ ადგილზე ვაყენებ».

«ბოლო 9 თვის მანძილზე, ვცდილობდი ჩვეულებრივი დიასახლისი ვყოფილიყავი: სამზარეულოში ვტრიალებდი, ძაღლებს ვუვლიდი, ბავშვებს, ძილის წინ, ზღაპრებს ვუყვებოდი... და დამიჯერეთ, ეს ყველაფერი, ცუდად არ გამომდიოდა».