ავღანეთში მამაკაცმა არასრულწლოვანი გოგონა ზრდასრულ მამაკაცს მიათხოვა. გოგონა მხოლოდ ექვსი წლისაა, მამაკაცი კი - 55 წლის.

უგულო მამამ შვილი ერთი თხის, ჩაის, შაქრის და ერთი ტომარა ბრინჯის სანაცვლოდ გაყიდა, - აცხადებს რადიოსადგურ RFI-ის რეგიონალური რედაქცია.

ექვსი წლის გოგონას (მის სახელს არ ახმაურებენ) საქმრო 55 (!) წლის სეიედ აბდულკარიმია. როცა ამ ფაქტის შესახებ სამართალდამცველებმა შეიტყვეს, მათ საქმრო დააპატიმრეს, ხოლო გოგონას მამა მიმალვაშია და მას პოლიცია ეძებს.

სამართალდამცავ ორგანოებს მომხდარი ფაქტის შესახებ ადგილობრივმა ჟურნალისტმა ფავად ახმადიმ დროზე შეატყობინა. ბავშვი პირდაპირ ქორწილიდან წამოიყვანეს და თავის ოჯახში დააბრუნეს. ფადივ ახმადის თქმით, ავღანეთში ძალიან ხშირია ასეთი უთანასწორო ქორწინებები, თუმცა ხელისუფლებას ყოველთვის როდი აქვს რეაქცია ამაზე.

ახმადიმ აგრეთვე აღნიშნა, რომ ავღანეთის პროვინციებში ქორწინებების 50%-ზე მეტი არაკანონიერია. ადგილობრივმა ხელისუფლებამ და პოლიციამ კარგად იციან არსებული სიტუაციის შესახებ, თუმცა მასზე ყურადღებას არ ამახვილებენ. ჟურნალისტმა დაამატა, რომ ამ ქვეყანაში ქალთა უფლებები საერთოდ არაა დაცული.

ავღანეთში არსებული კანონმდებლობის მიხედვით დაქორწინების უფლება აქვთ ქალებს 16, ხოლო მამაკაცებს 18 წლიდან.