ერთი აჭარის ზღვისპირეთიღა დაგვრჩა ქართველებს ზაფხულის პერიოდში გასაგრილებლად და აგერ 25 წლის შემდეგ, რაც აღარც სოხუმი, აღარც გაგრა, აღარც ბიჭვინთა და აღარც რიწა ჩვენთვის აღარ არსებობს, ქართველები ბათუმს, ქობულეთს, გონიოს, შეკვეთილს და სარფს მივასკდით, ობიექტური რეალობაა ისიც, რომ - თურქულ-ეგვიპტური ტერორიზმს შეშინებულებმა, უარი ვთქვით მარად მზიან მარმარისზე, ანტალიაზე, შარმელ-შეიხზე და ა.შ.

ტერორიზმის შიში ჩვენს გარდა რუსებს, უკრაინელებს და დანარჩნ მსოფლიოსაც გაუჩნდა და მათაც მასობრივად უარი თქვეს თურქეთზე და ეგვიპტეზე, რაღა დარჩენოდათ - გაუმართავი ინფრასტრუქტურით ცნობილ სოხუმს და გაგრას (ბოლო 25 წლის მანძილზე) მათაც აჭარული კურორტები არჩიეს, მართალია უმზეოდ და მაღალი, საშინლად მაღალი ფასებით, მაგრამ ასეთუისე გამართული ინფრასტრუქტურით... თუმცა... გადავხედოთ ფოტო-კოლაჟს - ბათუმი 2016, ივლისის შუა წელი

ჩვენ, კრიტიკული თვალით დანახულს შემოგთავაზებთ და დადებითს და კარგს ისედაც ყველა ვხედავთ, რაც არ მოგვწონს იმას ვიტყვით, ისევ მოყვარეს პირში უძრახეს პრინციპით და არა ნიშნის მოგებით... გამოსწორების იმედით!!!!

ბათუმელები ამბობენ (თანაც ხმამაღლა) - მიუხედავად იმისა, რომ თურქულ-ეგვიპტურ კურორტებს დამსვენებელი შიშით აღარ აკითხავს, ჩვენთან მაინც ხალვათობაა და ივლისის შუა წელს მსგავსი რამ საშინელი დასანახიაო, გულისხმობენ შეთხელებულ ზღვის სანაპიროებს, ცარიელ შეზლონგებს

ქართული "პლაჟების" განუყრელი მშვენება: - ცივი "ფანტა" "კოკა-კოლა" ცივი ყავა და სიმინდი 2 ლარად ერთი ტარო... ეს, ყველაფერი ქართული რეალობის სარკეა, გაჭირვებული მოსახლეობა, ორი კაპიკის საშოვარზე სახლიდან გამოსული მოხუცები, ახალგაზრდები, სტუდენტები, რომლებიც სწავლის ფულის შეგროვებას (!) ამ გზითაც კი ცდილობენ...

ველოსიპედით გასეირნება გსურთ ბათუმის ბულვარში, სააკაშვილის გაკეთებულ ველო-ბილიკებზე? თუ ახალგაზრდა 16-22 წლის ლამაზად გარუჯული, სექსუალური, ლამაზ ფეხება გოგო არ ხართ, 15-25 წუთში 5 ლარის გადახდა მოგიწევთ (და ფასი, რომ არ გაგიკვირდეთ და ხელმეორედ არ იკითხოთ ველოების გამქირავებელ ახალგაზრდა ბიჭებთან, რომლებიც სხვათაშორის დღეში მხოლოდ 10-15 ლარის ფასად დგანან ამ ადგილებზე სამწუხაროდ, დიდად ამობეჭდილ ხუთ ლარიანის ფოტოებს დაგახვედრებენ)

გაგიკვირდებათ და ეს, ბათუმის ცენტრში, უმაღლესი კლასის სასტუმრო "რედისონიდან" 100 მეტრში მდგარი შენობაა, რომელიც როდის ჩამოინგრევა კაცმა არ იცის, საკვირველია - ან ნაცებმა ვერ შეამჩნიეს 9 წლის მანძილზეე, ან ქოცები ვერ ამჩნევენ ბოლო 4 წელიაა? თუ ისეთი კერძო მეპატრონე ყავს, რომ "ავი ძაღლი არც თვითონ ჭამს და არც სხვას აჭმევს" ამბავია?!

ეს აბაზანაცაა და ტუალეტიც, ერთ კვადრატულზე ნაკლები ფართია, ის ასეთუისე სუფთა ოთახზეა მიბმული გარედან (ერთი დღე 50 ლარი)... უნიტაზზე დაჯდომა - გვერდულად, დუშის გადავლება (გაგიკვირდებათ და დუშიცაა აქ) ცალი ფეხი შიგნით, ცალი გარეთ... კომენტარი კიდევ საჭიროა?!

ავტომანქანებს უცხოური ნომრებით ხშირად ნახავთ ბათუმში, ჰო, ეს ის ხალხია რომლებმაც დასასვენებლად იძულებით, აზიურ კურორტებს აჭარული შავი ზღვა არჩიეს, სხვათაშორის გამუდმებით წუწუნებენ... გამუდმებით და რომ ვერც შეედავები!!!! ყ ვ ე ლ ა ფ ე რ შ ი მართლები არიან რასაც აკრიტიკებენ

სარფი, ალბათ ერთ-ერთი ყველაზე სუფთა ზღვის წყალი ამ მიდამოებში იყო, ჰო... იყო... მხოლოდ ადრე, ახლა ასე აღარაა, სარფის "პლიაჟამდე" 100 მეტრში, ჩანჩქერის წინ... აი, ასეთი საშინელი ხელოვნური ნაგავსაყრელია, რომელიც... ყარს!!!

პატრული თავის მოვალეობას პატიოსნად ასრულებს - მაქსიმალურად ცდილობს ბიუჯეტი, ისედაც გაწამებული მძღოლებისგან გამოტყუებული კაპიკებით შეავსოს, საცობები, საცობები, საცობები, უაზროდ გადაკეტილი გზის მონაკვეთები და სრული სატრანსპორტო კოლაფსი, ასეთი იყო ბათუმის ცენტრი ივლისის შუაწელს

სხვათაშორის, ბათუმის ბულვარის ეს ტუალეტი, მგონი ყველაზე იაფი რამაა ამ სეზონზე.... "დიდიც" და "პატარაც" 70 თეთრი ღირს... არც 50 და არც ლარი... აი, ასე - უბრალოდ 70 თეთრი... გაჭირვებული კაცის ამბავი, რომ იცის მეორე გაჭირვებულმა ქართველმა 2 ლარი, რომ არ ღირს არ გიკვირთ?

ამას ალბათ კომენტარი არ სჭირდება - კარგადაა გაკეთებული, სხავთაშორის ქუთაისს დიდი ხანია მსგავსი სანაგვე ურნები "ამშვენებს" და წესებსაც იცავენ ქუთაისლები (შემოწმებული გვაქვს), აი რასაც ვერ ვიტყოდი ბათუმის სტუმრებზე, რომლებიც გაუგებარი მიზეზების გამო, ხშირ შემთხვევაში არ უყურებენ, რომელ ურნაში, რომელ ნაგავს ყრიან... (იქნებ იმიტომ, რომ ჰგონიათ მეეზოვე მაინც ერთ დიიიდ ურნაში, ერთიანად ჩაცლის სამივე პატარა ურნას?!)

ეს ცხენი (!) ალბათ ბათუმის ბულვარის შესასვლელის ერთ-ერთი კოლორიტული ფიგურაა, ვინ იცის რამდენი გოგონა თეთრ ცხენზე ამხედრებულ თავის პრინცს სწორედაც, რომ ბათუმში ეძებს... შეგიძლიათ ერთ ლარად შემოსკუპდეთ ამ ცხენზე, ფოტო გადაიღოთ და ვინ იცის, ის პრინცი თქვენ აღმოჩნდეთ ვინმესთვის... დროებითი მაინც, სეზონური :)

ძალიან საინტერესო ბინოკლია, 6 თუ 8 ცალი დგას ამ ადგილზე, სხვათაშორის ამ პერიოდში არცერთი (!) ... ვიმეორებ - არცერთი ბინოკლი არ მუშაობდა და მეტიც - ისე ხარბად ყლაპავდა რკინის ერთ ლარიანებს და იმდენ გინებას "უსმენდა" დამსვენებლებისგან, ყველა რომ ასრულდეს 9 თვეში მთავრობა (რაშუაში იყო, მაგრამ მაინც) ერთი-ასად უნდა გამრავლდეს...

სულ დამავიწყდა... რუსები, უკრაინელები, მოლდოველები... მოკლედ სსრკ-ს თითქმის ყველა ერის დამსვენებელი (ქართველების გარდა) და... ირანელები, ირანელები, ირანელები... ძალიან ბევრნი.

შეკვეთილში ბიძინას აშენებული დიდი საკონცერტო დარბაზი, 10, 000 კაციანი... ივლისის ბოლოს ქრისტინა აგილერა იმღერებს, მერე კიდე ვიღაც, მერე კიდე ვიღაც, მერე კიდე ვიღაც (ალბათ) და ასე სექტემბრამდე... მერე? მერე იმან იდარდოს ვისაც ბიძინა ივანიშვილმა ეს უზარმაზარი, გრანდიოზული, ჰაი-კლასის დარბაზი აჩუქა... დანარჩენი, არასეზონური 9 თვე მათ მოუარონ... და ეს "მათ" ვინაა იცით? - ჩვენ ანუ სახელმწიფო, ჩვენ, ჩვენი ჯიბეებიდან და გადასახადებიდან უნდა შევინახოთ ეს "საჩუქარი"... მაგარია არაა?!

... და ბოლოს, დარდი მოგაწვა? დანაღვლიანდი? ფული აღარ გაქვს? - დაუჯექი ბულვარში დადგმულ გაუმართავ, არეულ კლავიშიან პიანინოს და დაუკარი "ცანგალა და გოგონაა, ცანგალა და გოგონაა" ჩვენ ხომ მალე (!) ევროკავშირში უ ნ დ ა მიგვიღონ....!