Horizontal Type Mask Tool (ჰორიზონტალური ტექსტ-ნიღაბი) და Vertical Type Mask Tool (ვერტიკალური ტექსტ-ნიღაბი) ხელსწყოები ტექსტის ფორმის გამოყოფის ოლქების შესაქმნელად გამოიყენება. ამ ხელსაწყოების არსებობა იმას არ ნიშნავს, რომ მსგავსი გამოყოფის ოლქების შექმნა ტექსტის შექმნის ვექტორული ხელსაწყოების გამოყენებით არ შეიძლება. იმის გასარკვევად, თუ რა განსხვავებაა ამ ხელსაწყოებს შორის, განვიხილოთ ერთი მაგალითი: ერთნაირი შედეგის მისაღებად, ჯერ გამოვიყენოთ ტექსტის შექმნის ვექტორული ხელსაწყო, ხოლო შემდეგ, რასტრული.

გავხსნათ გამოსახულება ფოტოშოპში. გავააქტიურო Horizontal Type ხელსაწყო და ავკრიფოთ ტექსტი.

დავაჭიროთ Ctrl ღილაკს და დავაწკაპუნოთ ტექსტის ფენაზე, Layers პალიტრაში. შეიქმნება გამოყოფის ოლქი. გავთიშოთ ტექსტის ფენის ხილვადობის „თვალი“.

იგივე შედეგის მიღება, Horizontal Type Mask ხელსაწყოს გამოყენებით უფრო სწრაფად შეიძლება. ამ ხელსაწყოს ისეთივე პარამეტრების პანელი აქვს, როგორც ტექსტის შექმნის ვექტორულ ხელსაწყოს, მაგრამ ხელსაწყოსთან მუშაობის წესი განსხვავებულია.

ხელსაწყოთი გამოსახულებაზე დაწკაპუნებისთანავე, ირთვება „სწრაფი ნიღბის“ რეჟიმი. ტექსტის აკრეფის შემდეგ, მხოლოდ ტექსტის შიგნით ჩანს გამოსახულების ნაწილი, დანარჩენი გამოსახულება წითელი ნიღბით არის დაფარული.

ტექსტის რედაქტირება და დაფორმატება შეიძლება მანამდე, ვიდრე ის „სწრაფი ნიღბის“ რეჟიმში იმყოფება. ამ რეჟიმში ტექსტის დასაფორმატებლად, საჭიროა მისი მონიშვნა, კურსორის გადატარებით. ტექსტის მიღების ღილაკზე დაწკაპუნების შემდეგ, იქმნება გამოყოფის ოლქი და მასთან მუშაობა მხოლოდ რასტრული ხელსაწყოებით არის შესაძლებელი.

Horizontal Type Mask ხელსაწყო არ ქმნის ფენას და ტექსტის გადაადგილება გამოყოფის ოლქის შექმნის რომელიმე ხელსაწყოს გააქტიურებით არის შესაძლებელი, ისიც იმ შემთხვევაში, თუ ხელსაწყო ახალი ოლქის გამოყოფის რეჟიმში იმყოფება და კურსორი გამოყოფის ოლქის შიგნით არის მოთავსებული. ტექსტის გადაადგილება და ტრანსფორმირება ასევე შეიძლება ბრძანებით: მენიუ Select> Transform Selection.

მიღებულ გამოყოფის ოლქში შეიძლება ფერის, ტექსტურის ან გრადიენტის ჩასხმა და კონტურის შემოვლება (ამგვარი ოპერაციების ჩატარება უმჯობესია ცალკე ფენაზე).

ინტერნეთში გამოქვეყნებულ გამოსახულებაზე საავტორო უფლების დაცვის რამოდენიმე ხერხი არსებობს. შესაძლებელია საავტორო უფლების დასაცავად, როგორც ერთჯერადი, ისე მრავალჯერადი გამოყენების ტექსტის ფენის შექმნა.

I. საავტორო უფლების დაცვის ერთჯერადი გამოყენების ფენის შექმნა:

1) გავხსნათ გამოსახულება და Horizontal Type Mask ხელსაწყოს გამოყენებით ავკრიფოთ ტექსტი.

2) Ctrl+J ღილაკების კომბინაციით მოვახდინოთ ტექსტის კოპირება ახალ ფენაზე

3) გამოვიყენოთ ტექსტის ფენისთვის Bevel and Emboss ეფექტი.

II. საავტორო უფლების დაცვის მრავალჯერადი გამოყენების ფენის შექმნა:

1) Horizontal Type ხელსაწყოს გამოყენებით ავკრიფოთ თეთრი ფერის ტექსტი.

2) გადავიყვანოთ ტექსტის ფენა Multiplay რეჟიმში (ტექსტი გაქრება გამოსახულებიდან) და გამოვიყენოთ Bevel and Emboss ეფექტი.

ამ ტექსტის შენახვა PSD ფორმატში შეიძლება. რადგან ტექსტი ვექტორულია, ზომის დაპატარავების ან გაზრდის შემთხვევაში, ხარისხი არ შეიცვლება და ამიტომ, მისი გამოყენება შეიძლება ნებისმიერი ზომის გამოსახულებაზე.