ტელეკომპანია "რუსთავი 2"-ის გარშემო აჟიოტაჟი არ წყდება. მაყურებელი, პოლიტიკოსები და ცნობადი სახეები ორ ნაწილად არიან გაყოფილნი, ზოგიერთები ტელევიზიის მხარეს იჭერენ, მეორენი კი პირიქით.

ჟურნალისტი მაია ასათიანი სოციალურ ქსელში ცნობად სახეებს მიმართავს: "8 წელი – რამდენიმე ათეული ახალი სიმღერის პრემიერა, 8 წელი – რამდენიმე ათეული სოლოკონცერტის წინასაპრემიერო პრომოუშენი, 8 წელი – ათეულობით კლიპი, პრეზენტაცია, გამარჯობის ნაცვლად "იცი, რა მინდა გთხოვო", ახალი მომღერლები, ახალი ჯგუფები… გოგოები, ბიჭები… ბევრნი, ძალიან ბევრნი… ყველასთვის უცნობები და "პროფილით" ვარსკვლავებად ქცეულნი! სად ხარ ახლა შენ? სად? ალბათ, სეირს უყურებ – ვინ გაიმარჯვებს! მინდა იცოდე, შენ უკვე დამარცხდი!

ეძღვნება "პროფილის" უკლებლივ ყველა ცნობილ სტუმარს, ათეულობით ადამიანს (ოთო ნემსაძის გარდა!“).

პ.ს. თითო გული მაინც გამოგეგზავნათ ინბოქსში!.."

ცნობადი სახეების ნაწილი ტელეკომპანია "რუსთავი 2"-ს სოციალური ქსელის მეშვეობით მხარს უჭერს, ზოგი მათგანი კი გამართულ აქცებსაც უკლებლივ ესწრება. მაია ასათიანის უკმაყოფილება კი ცოტა გაურკვეველია. მის პოზიციას იზიარებს არხის გენერალური დირექტორი ნიკა გვარამია: "ეს ყველაფერი რომ გადაივლის და აფაფხურდებიან, მერე ჩვენი რიგი მოვა პასუხის გაცემის, სოფლის კლუბი არხების მეტი რაა, წავიდნენ და დასხდნენ".

საზოგადოების ნაწილი გავრცელებულმა განცხადებებმა გააღიზიანა და ამტკიცებენ, რომ "რუსთავი 2"-ის წარმომადგენლები ცნობადებს აშანტაჟებენ და აქციებზე დიდი რაოდენობით ხალხის შესაკრებად ყველა ძალას ხმარობენ.