რატომ არის რომ ყველა დროში და თითქმის ყველა ერში, არიან ადამიანები, რომლებსაც არ უყვართ ებრაელები? ბევრი სვამს ამ კითხვას “რატომ? რისთვის? რა მიზეზით გაჩნდა ანტისემიტიზმი?"

მარკ ტვენი მოთხრობების კრებულში “წერილები დედამიწიდან" წერდა: “ყველა ერი ვერ იტანს ერთმანეთს და ყველა ერთად - ებრაელებს". სამწუხაროდ ის მართალი იყო. კაცობრიობის ისტორია - ეს არის ომების ისტორია. ერთმანეთს ვერ იტანდნენ და ერთმანეთის წინააღმდეგ იბრძოდნენ ინგლისელები და ფრანგები, გერმანელები და ფრანგები, რუსები და პოლონელები, რუსები და გერმანელები, სომხები და აზერბაიჯანელები, სომხები და თურქები, ალბანელები და სერბები... ყველას ჩამოთვლა შეუძლებელია. ქსენოფობია (ქსენოფობია [ბერძ. xenos უცხო, უცხოელი და phobos შიში] - უცხოელებისა და ყოველივე უცხოურის სიძულვილი) საყოველთაოდ გავრცელებული მოვლენაა. ვის ვერ იტანენ ყველაზე ხშირად? რა თქმა უნდა იმ უცხოელებს რომლებიც ახლოს ცხოვრობენ. მერე და ვინ ცხოვრობდა, თითქმის, ყველა ერთან ახლოს, უკანასკნელი 2000 წლის მანძილზე? პასუხო მხოლოდ ერთია - ებრაელები. ისინი ყოველთვის განტევების ვაცის როლში იყვნენ, რადგან მათ არც სამშობლო ჰქონდათ, არც არმია და არც პოლიცია ანუ არ ჰქონდათ დაცვის არანაირი საშუალება. ძლიერებისთვის კი, ყოველთვის დაუცველია დამნაშავე.

ამრიგად, პირველი მიზეზი საყოველთაო სიძულვილისა არის ის, რომ ებრაელებს არ ჰქონდათ სახელმწიფო და ძალიან დიდი ხნის მანძილზე ცხოვრობდნენ სხვა ერებთან.

მეორე მიზეზი: ებრაელებმა მსოფლიოს გააცნეს სამყაროს შემოქმედი - ერთი ღმერთი. მისცეს ბიბლია, მორალის კანონები ყველა დროისთვის. მათ მსოფლიოს მისცეს ქრისტე და შემდეგ უარყვეს ის. თუ რატომ გააკეთეს ეს, არავინ იცის. ოცი საუკუნის მანძილზე ბევრი ცდილობდა ამ საიდუმლოს ამოხსნას, მაგრამ პასუხს, ჯერ-ჯერობით, ვერავინ მიაგნო. ქრისტიანობის უარყოფის გამო მათ დაუპირისპირდა მთელი ქრისტიანული სამყარო. ვინ არ სთავაზობდა ებრაელებს იუდაიზმის უარყოფას. მუჰამედმა მათ შესთავაზა ისლამი მიეღოთ და ახალი სარწმუნოების სათავეებთან მასთან ერთად დამდგარიყვნენ. ებრაელებმა ამ შემოთავაზებაზე უარი თქვეს და საპასუხოდ შეურიგებელი მტერი გაიჩინეს ისლამური სამყაროს სახით.

მესამე მიზეზი: ებრაელი ხალხი წიგნიერი ერია. მათ ძალიან უყვართ კითხვა. ან. ჩეხოვი, როდესაც რუსეთის პროვინციებზე საუბრობდა, ყოველთვის აღნიშნავდა, რომ ქალაქებში შეიძლებოდა ბიბლიოთეკების დაკეტვა, რომ არა გოგონები და ებრაელები. კითხვისადმი სიყვარულის გამო, ყველა ებრაელი დიდი სიამოვნებით ეზიარებოდა იმ ხალხის კულტურას ვის გვერდითაც ცხოვრობდა. ამიტომ, არის რომ, ევროპაში ის საუკეთესო ევროპელია, ხოლო ამერიკაში საუკეტესო -ამერიკელი. ყველაზე ხშირად, სწორედ ამ თვისების გამო საყვედურობენ დღეს ებრაელებს. “ რუსული ერი დამცირებულია - ყვირიან ანტისემიტები რუსეთში - ებრაელებმა მას კულტურა წაართვეს". ამ საკითხთან დაკავშირებით ფილოსოფოსი ნ. ბერდიაევი წერდა: “არის რაღაც დამამცირებელი იმაში, რომ ებრაელებს შორის ძალიან ბევრი გენიოსია. რაზეც მე, ანტისემიტებს შემიძლია უპასუხო - გააკეთეთ თქვენ თვითონ დიდი აღმოჩენები ბატონებო".

ებრაელების ყველაზე დიდი უბედურება ის არის, რომ მათ მიდრეკილებაა, შეისისხორცონ სხვა ქვეყნის კულტურა და ტრადიციები. აქტიური მონაწილეობა მიიღონ იმ ქვეყნის განვითარებასა და წინსვლასში, რომლის მოქალაქეებიც არიან. დიდი მონდომებისა და თავდაუზოგავი შრომის შედეგად, ისინი გამოჩენილი საზოგადი მოღვაწეები და წარმატებული ადამიანები ხდებიან. ეს კი, ყველაზე მეტად აღიზიანებთ იმ ქვეყნის ანტისემიტებს.