სამსახურის "წყალობით" ხშირად მიწევს
სხვადასხვა ორგანიზაციაში ყოფნა და სიმართლე გითხრათ ხშირად ვაწყდები ჩინოვნიკების, თუ მათი დამხმარე პერსონალის დილეტანტურ დამოკიდებულებას იმ საქმისადმი, რომელ საქმესაც ემსახურებიან და საკმაოდ მაღალ ხელფასებსაც იღებენ.
ჩვენს წინაპრებს უთქვამთ: "პური მეპურემ უნდა გამოაცხოსო", მე სრულად ვეთანხმები და იმედია თქვენც დაეთანხმებით ამ ჭეშმარიტებას.
დღესაც ანალოგიურ სიტუაციაში აღმოვჩნდი, ხელმძღვანელის თხოვნით მივედი ერთერთ სახელმწიფო დაწესებულებაში და ვითხოვე გაეცათ პასუხი იმ საკითხის გარშემო, რომლის თაობაზეც პასუხი ჯერ კიდევ 10-15 დღით ადრე უნდა მოსულიყო ჩვენთან.
განყოფილება რომელსაც მივაკითხე, ახალგაზრდა გოგონებით აღმოჩნდა დაკომპლექტებული და ჩემს კითხვაზე- თუ რა ბედი ეწია დოკუმენტს, რომელზეც პასუხი ადრე უნდა მიგვეღო, პასუხად მივიღე: რა დოკუმენტზეა საუბარი?
როდესაც ავუხსენი რაზეც იყო საუბარი, სულ აირია ყველაფერი. ერთი ერთს ამბობდა, მეორე მეორეს და მესამე კი მესამეს.
დროის ნაკლებობის გამო იძულებული ვიყავი პოლემიკაში არ ჩავრთულიყავი და წასვლა გადავწყვიტე, რადგან იქ გაჩერებას და ამ გოგონებისათვის რაიმეს ახსნას აზრი არ ჰქონდა მათი დაბალი კვალიფიკაციის გამო.
წასვლის წინ ვერ მოვითმინე და ვუთხარი, დილეტანტები ხართ მეთქი!
საკმაოდ ეშხიანმა გოგონამ რომელსაც ჩემთან საუბრისას სიგარეტის მოწევა წამითაც არ შეუწყვეტია, ყელის მოღერებით მომახალა: ცდებით ბატონო, ჩვენ დილეტანტები არა ვართ დიეტას სათითაოდ ვიცავთო! მე არ ვიცი დილეტანტი მათთვის რასთან ასოცირდება, მაგრამ რაც მე ვნახე იმან კი ლამის "შოკში" ჩამაგდო, ამიტომაც "გამოვგლიჯე" კარები და დერეფანში გავვარდი, მორიგი სისულელე რომ არ მომესმინა, რომელსაც აუცილებლად მეტყოდნენ.