რუსეთის დედაქალაქმა, მოსკოვმა თბილისობას უმასპინძლა. საზეიმო კონცერტში თბილისიდან ჩასულმა და მოსკოვში მოღვაწე ქართველებმა მიიღეს მონაწილეობა. ერმიტაჟის ბაღში რამდენიმე ქართულმა რესტორანმა საკუთარი პროდუქტი წარადგინა, მისულ სტუმრებს ქართული კერძები დააგემოვნებინეს და რამდენიმე მათგანის მომზადებაც ასწავლეს.

კონცერტის მონაწილეები გახლდნენ თამარ გვერდწითელი, სოსო პავლიაშვილი, ლელა წურწუმია, ირაკლი ფირცხალავა, ნინო ჩხეიძე, ჯგუფი "ფრანი", ანსამბლი "მეტეხი და სხვები...

"მოსკოვში ბევრი ქართველი და თბილისელი ცხოვრობს. მიხარია, რომ აქ აღმოვჩნდი"-გვიამბობს ნინი ბადურაშვილი.

"თბილისობის დღესასწაულზე მოსკოვში არასდროს არ ვყოფილვარ. ძალიან მიხარია, რომ ჩემი მონატრებული ქართველებისათვის შემიძლია შევასრულო რამოდენიმე სიმღერა"-ამტკიცებს ლელა წურწუმია.

ქართველების ვიზიტმა მოსკოვში ქართველების ნაწილი გააღიზიანა. როგორც ზოგიერთები ამტკიცებენ, ოკუპანტ ქვეყანაში ქართველები კონცერტებს არ უნდა ატარებდნენ.

"მახსოვს ჩვენი "აღშფოთება" მოსკოვში მოცეკვავე თუ მომღერალ ადამიანებზე! მაშინვე ვამბობდით, აი პუტინს უმღერიან... ცუდები, ხშირ შემთხვევაში მოღალატეებსაც ვეძახდით! დღეს ყველა ჩუმად ვართ მოსკოვში წასულ ახალ შემადგენლობაზე! თბილისობა რომ იმართება თურმე ხუბუტიას ორგანიზებით. ორმაგი სტანდარტების ხალხი ვართ!"-წერდა ჟორჟოლიანი სოციალურ ქსელში.

"ბევრად ჯობია მოსკოვში იმღერო ვიდრე თბილისში დააშავო! მომღერალია და უნდა იმღეროს თბილისშიც, თელავშიც, თერჯოლაშიც, ევროპაშიც, მოსკოვშიც და სხვათაშორის სოხუმშიც!!! და საერთოდ ყველამ თავის საქმეს რომ მიხედოს ჯობია!!! არც მე მომწონს პრორუსი პოლიტიკოსები, მაგრამ თქვენი ოჯახებიდან რუსეთში თავისი (და შეიძლება თქვენი) ოჯახების სარჩენად წასული ქართველებიც ნუ დაგავიწყდებათ სანამ ასე მარტივად 1800 კილომეტრის მანძილიდან განიკითხავდეთ!!!"-წერს ნოე სულაბერიძე სოციალურ ქსელში.