ჩრდილოეთ საბერძნეთში, ისტორიული მაკედონიის ტერიტორიაზე, ქალაქ სალონიკიდან 105 კილომეტრში მდებარეობს უძველესი ქალაქის ამფიპოლისის ნანგრევები. ეს არის ადგილი, სადაც საფუძველი ჩაეყარა ალექსანდრე მაკედონელის, ანუ დიდი ალექსანდრეს იმპერიას. ამფიპოლისის ბოლოდროინდელი გათხრების შედეგად არქეოლოგებმა მიაგნეს უზარმაზარ სამარხს, რომელიც კედლითაა შემოსაზღვრული.

არქეოლოგების მღელვარება თავიდან ამ კოლოსალური კედლის აღმოჩენამ გამოიწვია, რადგან მისი სიგრძე 500 მეტრს აღწევს და თითქმის იდეალური წრის ფორმა აქვს. კედელი ტასოსის თეთრი მარმარილოსგანაა აშენებული.

წინასწარი მონაცემებით, სამარხი აშენებულია დაახლოებით 300-325 წელს ჩვენს წელთაღრიცხვამდე და აქვს ალექსანდრე მაკედონელის უახლოესი მეგობრის, არქიტექტორ დინოკრატესეული ხელწერა.

კედლის ზედა ნაწილში აღმოჩენილია თავმოკვეთილი ლომის ორი ქანდაკება. ისინი მარმარილოსგანაა გამოკვეთილი და თითოეული მათგანის სიმაღლე 5 მეტრს აღწევს. სფინქსების აღმოჩენა განსაკუთრებით მნიშვნელოვანია, რადგან ცნობილია, რომ ანტიკურ ხანაში ასეთ ქანდაკებებს ცნობილი მეფეების საფლავების შესასვლელთან დგამდნენ. არქეოლოგებს გაუჩნდათ იმედი, რომ მათი დიდი ხნის ოცნება ახდება და დიდი ალექსანდრე მაკედონელის სამარხი იქნება აღმოჩენილი, თუმცა ჯერჯერობით მკვლევარები დუმილს ამჯობინებენ და გათხრების დასრულებას ელოდებიან, რადგან მთავარ ოთახამდე ჯერ არ მიუღწევიათ.

ამჟამად გათხრები ინტენსიურად მიმდინარეობს. ამფიპოლისისაკენ მიმავალი ცნობისმოყვარე ხალხის ნაკადი არ წყდება, თუმცა გათხრების პერიმეტრს უკვე შემოავლეს ღობე და მას პოლიციის გაძლიერებული კორდონი იცავს.

გამართლდება თუ არა არქეოლოგების იმედები და იპოვნიან თუ არა ალექსანდრე მაკედონელის სამარხს? ამას დრო გვიჩვენებს.