"ვამპირების სოფელი"-ასე უწოდებენ ხოლმე ბრაზილიის ერთ-ერთ სოფელ არარასს, რომელიც განლაგებულია მთიან ქედებს შორის მდებარე ულამაზეს ხეობაში. სოფელ არარასის მცხოვრებლებისათვის მზე- მათი დაუძინებელი მტერია. ისინი იძულებული არიან დაემალონ მზეს და სახლებიდან მხოლოდ საღამოობით გამოვიდნენ, როგორც მითოლოგიური ვამპირები.

საქმე იმაშია, რომ სოფელ არარასის მცხოვრებლები იტანჯებიან უიშვიათესი კანის დაავადებით, რომელიც პიგმენტაციის დარღვევასთანაა დაკავშირებული და მას პიგმენტური ქსეროდერმა ჰქვია.

ამ ადამიანების კანი ისეთივე სათუთია, როგორც პერგამენტი. ის ძალიან თხელია და მგრძნობიარე მზის სხივების მიმართ. კანს არ გააჩნია არავითარი დამცავი მექანიზმი. ულტრაიისფერი გამოსხივება კანის საშინელ დეფორმაციას იწვევს, ხანდახან ის უბრალოდ "დნება" მზის სხივების ქვეშ.

არარასი ერთადერთი ადგილია დედამიწაზე, სადაც ამ დაავადებით დატანჯული ყველაზე მეტი ადამიანი ცხოვრობს. რატომაა თითქმის მთელი სოფელი ავად? ამ კითხვაზე პასუხი წარსულში უნდა ვეძებოთ. საქმე იმაშია, რომ სოფელი დააარსა რამოდენიმე ნათესაურმა ოჯახმა, ესე იგი აქ ხშირად ჰქონდა ადგილი ინცესტს და ამის შედეგად გავრცელდა მემკვიდრეობითი დაავადება-პერგამენტის კანი.

სურათზე თქვენ ხედავთ სოფლის მცხოვრებ ანტონიო ჟარდინს, რომელიც ექიმის კონსულტაციას ელოდება. მას უკვე 50-ზე მეტი ოპერაცია ჩაუტარდა კანზე წარმონაქმნების მოსაშორებლად, მაგრამ ამის ერთადერთი შედეგი ის იყო, რომ ჟარდინიმ ცხვირი დაკარგა. ის იხსენებს, რომ სიმსივნური წარმონაქმნების გაჩენის პირველი სიმპტომები 9 წლის ასაკში გამოეკვეთა.

არარასის მცხოვრებთა უმეტესობა ფართე შლიაპებს ატარებს, რომ როგორმე დაიცვან თავი მზის სხივებისაგან და შეაჩერონ ავადმყოფობის პროგრესირება, მაგრამ მოსახლეობის ძირითად ნაწილს ეს არ შველის და ისინი იძულებული არიან მხოლოდ დაღამებისას გამოვიდნენ სახლებიდან.. აი რატომ უწოდებენ არარასს "ვამპირების სოფელს".

სოფლის მცხოვრებლები თავიანთ ბავშვებს დაბადებისთანავე იცავენ მზისაგან, რადგან არავინ იცის, როდის იჩენს თავს ავადმყოფობა.

დეფორმირებული კანი და სიმსივნური წარმონაქმნები არარასელების ერთადერთი პრობლემა არაა. პერგამენტის კანს თან ახლავს გვერდითი მოვლენები, როგორიცაა: სმენის დაქვეითება, კუნთების ტონუსის კლება, მოძრაობის კოორდინაციის პრობლემა, აუტიზმი, მაგრამ მთავარი პრობლემა მათთვის მაინც მზეა.