ახალგაზრდა იურისტი, მარიამ კუბლაშვილი ფართო საზოგადოებამ პროექტ "ცეკვავენ ვარსკვლავების" წყალობით გაიცნო. გოგონა ახმეტაში დაიბადა, დედა პანკისელი ქისტი ჰყავს. 5 წლისას მამა გარდაეცვალა. ბიძამ ოჯახი ღია ცის ქვეშ დატოვა. წლების მანძილზე ნათესავებთან სამოწყალოდ ცხოვრობდნენ, რის გამოც გოგონამ 11 სკოლა გამოიცვალა. იურიდიულ ფაკულტეტზე ჩააბარა, რადგან მამის მიერ დატოვებული კუთვნილი ქონება დაებრუნებინა. სანამ უნივერსიტეტი დაამთავრა ხანდაზმულობის ვადა გავიდა, ქონება ვეღარ დაიბრუნა. უნივერსიტეტის დამთავრების შემდეგ ადვოკატობას მიჰყო ხელი. ერთი რთული საქმე მოიგო, ჰონორარი კი ბინის პირველადი შენატანისთვის ეყო.

მარიამს 5 წლით უფროსი ძმა ჰყავს, რომელიც ასევე პანკისელი ქისტია და თან ძალიან მკაცრი. "დედისთვის და ძმისთვის წარმოუდგენელია ჩემი, როგორც ადვოკატის, სცენაზე გამოსვლა და ცეკვა, ამიტომ ახლა წამოსული ვარ სახლიდან და ცალკე, ქირით ვცხოვრობი. ისინი ცოტა სხვა ტრადიციების ხალხია. პანკისს და მის მკაცრ ტრადიციებს ვერ ვეგუებოდი. ჩაცმულობის გამო იქ სულ მკიცხავდნენ"- ამტკიცებს მარიამი.

კონკურსის ერთ-ერთ ტურზე მარიამმა დედა შენიშნა, თუმცა მაინც სწყინს, რომ მან მაშინ მიატოვა, როდესაც დახმარება ყველაზე მეტად სჭირდებოდა. "ძმამ კი მომწერა, რომ ამას არ მაპატიებს. თუ ჩეჩნური წესით აპირებს ჩემზე შურისძიებას, ანდერძს დავტოვებ, რომ ცუდის გაკეთება არ მინდა, უბრალოდ მინდა, დავამტკიცო, რომ მონდომებას შედეგი მოაქვს და მიუღწეველი არაფერია"-გვიამბო მარიამმა.

მარიამს ერთი ვაჟი ჰყავს, 9 წლის გიორგი-არბი. არბი ჩეჩნური სახელია. მარიამს უნდა მის ვაჟს წარმომავლობა ყოველთვის ახსოვდეს.