42 წლის კონდიტერს დიდი ბრიტანეთიდან ანაბელ დე ვეტენს მეორენაირად ანაბელ დე ლექტერს უწოდებენ. ეს მყვირალა მეტსახელი ტყუილად როდი შეარქვეს მას. ანაბელი, რომელიც ადრე სკულპტორი იყო, სპეციალიზირებულია განსაკუთრებული და უცნაური ტორტების შექმნაზე, რომელსაც ვერცერთ ნორმალურ საკონდიტროში ვერ იპოვით. უდავოდ ნიჭიერი ქალი აცხობს საოცრად რეალისტურ, მაგრამ შიშისმომგვრელ და შემაძრწუნებელ ტორტებს.

ადამიანის ტვინი, შოკოლადისგან დამზადებული ჩვილების თავის ქალები, სხეულის სხვადასხვა ნაწილები და შინაგანი ორგანოები-ეს მცირე ჩამონათვალია იმ კულინარიული შედევრებისა, რასაც კონდიტერი აცხობს.

ანაბელის საკონდიტრო მდებარეობს ბირმინჰემში და მას "ილუზიონისტის სამზარეულო" ჰქვია.

ქალი ტორტების ცხობითა და გაფორმებით მხოლოდ 3 წელია, რაც დაკავებულია, მაგრამ ამ საქმეში საოცარ წარმატებას მიაღწია. ერთი ტორტის შესაქმნელად ოსტატს 30 საათამდე დრო სჭირდება და მათი საშუალო ფასი 400 ფუნტი სტერლინგია.

გთავაზობთ ანაბელის ნამუშევრებდან რამოდენიმეს ფოტოსურათს.. ვეცადე ყველაზე უწყინარი ტორტების ფოტოები ამომერჩია, მაგრამ რამდენად გამომივიდა, ეს თქვენ თვითონ შეაფასეთ.

P.S. მიუხედავად იმისა, რომ მეც კონდიტერი ვარ და სიახლე და კრეატიულობა არც ჩემთვისაა უცხო ხილი, შეძრწუნებული დავრჩი ამ ფოტოების ხილვით. ვერასოდეს შევძლებდი ამ საშინელებების გაკეთებას და შეთავაზებას ჩემი კლიენტებისათვის. ხომ არ შეიძლება, ფულის გამო ყველაფერზე წახვიდე... ან კიდევ, განა ნორმალური ფსიქიკის ადამიანს მოუნდება ამის შეჭმა? მკითხველო, თქვენთვის მომინდია ამ კითხვაზე პასუხის გაცემა.