მიმდინარე წლის 29 მაისს ჩიკაგოს ყველაზე მაღალი შენობის -103-სართულიანი ცათამბჯენის Willis Tower-ის სახურავზე მდებარე მინის აივანი, რომელიც ექსტრემის მოყვარული ადამიანების ატრაქციონს წარმოადგენს, ტურისტების ფეხებქვეშ დაიბზარა. ტურისტების თქმით, თავდაპირველად მათ გაიგონეს მსხვრევის ხმა, შემდეგ კი დაინახეს, თუ როგორ გაჩნდა ბზარები მინაზე.

"-ეს იყო ყველაზე საშიში მომენტი ჩემს ცხოვრებაში", -გამოტყდა შემდეგ ერთ-ერთი ტურისტი.

ამავე დროს ცათამბჯენის ადმინისტრაცია აცხადებს, რომ აივანზე მყოფ ტურისტებს არანაირი საფრთხე არ ელოდათ, რადგან გაიბზარა არა თავად იატაკი, არამედ მისი თხელი დამცავი საფარის ზედაპირი.

"-ეს ხდება ხოლმე და საშიში არაფერია, თვითონ იატაკი სამმაგი მინის სქელი შრისაგან შედგება და ხუთ ტონას უძლებს", - განაცხადა Willis Tower-ის ადმინისტრაციის წარმომადგენელმა.

აი ეს ტურისტები, რომელთა ფეხთაქვეშ დაიბზარა იატაკი...არა მგონია, ეს ოთხი მამაკაცი 5 ტონას იწონიდეს.

ამჯამად ატრაქციონი დაკეტილია და იქ მიმდინარეობს სარემონტო სამუშაოები. ასე რომ, ექსტრემის მოყვარულებო, ცოტაოდენი ხნით მოგიწევთ თქვენი ვიზიტის გადადება, თუკი ამ ცათამბჯენის მონახულებას და მძაფრი შეგრძნების მიღებას აპირებდით.