მაია ჯაბუას ქალიშვილი ლიზა ყენია ჯერ მხოლოდ 16 წლისაა და მას უკვე მთელი საქართველო იცნობს. სიმღერა ბავშვობიდან დაიწყო. მონაწილეობდა "რუსთავი 2"-ის პროექტ "ანაბანაში", რამდენიმე წლის შემდეგ საბავშვო ევროვიზის შიდაშესარჩევ ტურში გაიმარჯვა და საქართველო კონკურსზე წარადგინა. ახალგაზრდა მომღერალი ტელეკომპანია "იმედის" პროექტ "ნუცას სკოლის" ფინალისტიც გახლდათ, რამდენიმე თვის წინ კი "ახალ საბავშვო ხმაშიც" მიიღო მონაწილეობა. ის ეკა კახიანის გუნდის წევრი გახლდათ.

ლიზას მომღერლობა აქვს გადაწყვეტილი და ამისთვის დროსა და ენერგიას არ იშურებს. ახალგაზრდა მომღერალი ვოკალზე დადის და ინგლისურ ენას ეუფლება. გაგიკვირდებათ, მაგრამ ლიზა ინგლისურზე სამ პედაგოგთან დადის, ამერიკელთანაც, ინგლისელთანაც, ქართველთანაც. მომღერალი "სანო სტუდიასაც" ხშირად სტუმრობს, პირველ ალბომზე მუშაობს. ლიზასთვის ყველაზე მისაბაძი პიროვნება დედაა. "სულ მინდა, რომ გავიზრდები, გავხდე მაია ჯაბუა"-ამტკიცებს ახალგაზრდა მომღერალი. ხასიათით დედასაც ჰგავს და მამასაც, მაგრამ ცდილობს მშობლების კარგი თვისებები საკუთარ თავში გააერთიანოს.

ახალგაზრდა მომღერალი თავს ძალიან მდიდარ ადამიანად მიიჩნევს. ლიზას სიმდიდრე ფული და ქონება არ გეგონოთ. "მდიდარი ვარ: მყავს ორი და, ორი ძმა და ვარ ამაყი. ძმები – დედის მხრიდან, დები – მამაჩემის მხრიდან"-გვიამბო ლიზამ.

ვუსურვოთ მომღერალს წარმატებები და ბედნიერი მომავალი...